BINIGYANG DIIN ni Senadora Pilar Pia Cayetano ang kahalagahan ng pagtatayo ng mga dormitoryo upang suportahan ang mga student-athlete at mabigyan sila ng patas na oportunidad sa edukasyon sa ginanap na groundbreaking ceremony para sa bagong dormitoryo ng mga atleta sa Rizal Memorial Complex kamakailan.

Bilang dating pambansang manlalaro ng volleyball, binalikan ni Cayetano ang kanyang mga karanasan sa pagsasanay sa pasilidad at ipinahayag ang kanyang kagalakan sa pagbibigay ng kontribusyon pabalik sa Philippine sports.

Bilang Senior Vice Chairperson ng Senate Committee on Finance, binigyang-priyoridad niya ang mga proyekto ng dormitoryo, partikular para sa mga State Universities and Colleges (SUCs).

“Kailangan na kasama sa policy yung pagtatayo ng dorms. Inuunti-unti natin yan para all over the country, yun yung equitable access to education,” ayon sa kanya, na binibigyang-diin ang mga hamon ng mga estudyanteng dumaraan sa mahabang biyahe para mag-aral.

“Sila yung talagang gipit na gipit sa oras, and sila din yung nangangailangan talaga ng dorms,” dagdag niya, na tumutukoy sa mga student-athlete na kailangang balansehin ang kanilang akademya at mahigpit na iskedyul ng pagsasanay.

Sa parehong panayam, tinalakay rin ni Cayetano ang kontrobersyal na bagong patakaran ng UAAP (University Athletic Association of the Philippines) na nagtatakda ng karagdagang dalawang taong residency requirement para sa mga atleta na lumilipat ng paaralan sa ilalim ng UAAP.

Binanggit ni Cayetano ang batas sa proteksyon ng student-athlete na naglilimita sa residency requirement sa isang taon para sa mga college athletes na lumilipat ng paaralan. “Bawal ang ibang klaseng residency requirement,” diin niya.

Pinuna niya ang nasabing patakaran na nagpaparusa sa mga atleta at hinikayat ang UAAP na humanap ng mas maayos na solusyon para tugunan ang mga isyu sa paglipat ng mga manlalaro. “Solve it in an adult way. Don’t punish the kids. Don’t punish the athletes,” sabi niya.

Binanggit din ng senadora na maraming makatwirang dahilan ang mga atleta para lumipat ng paaralan, tulad ng personal na mga alitan o kagustuhan para sa mas maraming oras ng paglalaro. Aniya, ang bagong patakaran ay hindi makatarungan at nililimitahan ang potensyal ng mga atleta.

“It’s not about the medals that your university brings home. It’s about the lives that we can change through sports,” ani Cayetano, na hinimok ang UAAP na muling pag-isipan ang patakaran para sa kapakanan ng mga student-athletes.

Nagpahayag din si Cayetano ng positibong reaksiyon sa kamakailang desisyon ng Korte Suprema na nag-aatas ng buong remittances mula sa PAGCOR (Philippine Amusement and Gaming Corporation) at PCSO (Philippine Charity Sweepstakes Office) sa Philippine Sports Commission (PSC).

Ayon sa senadora, inaasahang magbibigay ng mas malaking pondo para sa sports development sa bansa ang nasabing desisyon ng Korte suprema, isang bagay na matagal na niyang isinusulong.

“Syempre matagal na natin gusto na madagdagan ang pondo for sports,” aniya, na binibigyang-diin ang kahalagahan ng pagbibigay ng mas maraming mapagkukunan para sa mga atleta at mga sports program.

Sa pamamagitan ng kanyang patuloy na trabaho sa Senado, nananatiling nakatuon si Cayetano sa pagpapabuti ng mga pasilidad ng sports, pagtitiyak ng suporta sa mga student-athletes, at pagtataguyod ng patas na pagtrato sa loob ng sports community.