ISTANBUL – Ayon sa isang bagong pag-aaral, ang mga taong hindi nakakainom ng sapat na tubig araw-araw ay maaaring makaranas ng mas matinding reaksiyong pisyolohikal sa stress, iniulat ng Irish broadcaster na RTE nitong Biyernes.

Natuklasan ng mga mananaliksik mula sa Liverpool John Moores University na ang mga indibidwal na may mababang fluid intake kada araw ay naglalabas ng mas mataas na antas ng cortisol, ang pangunahing stress hormone ng katawan, kapag nahaharap sa mga sitwasyong nakakapagpa-stress — kahit hindi sila nakaramdam ng matinding uhaw kumpara sa mga umiinom ng mas maraming tubig.

Ang pag-aaral, na inilathala sa Journal of Applied Physiology, ay ikinumpara ang dalawang grupo na binubuo ng tig-16 na adulto.

Ang isang grupo ay karaniwang umiinom ng mas mababa sa 1.5 litro ng tubig bawat araw, habang ang kabilang grupo ay sumusunod sa rekomendasyon ng European Food Safety Authority na humigit-kumulang 2.5 litro para sa mga lalaki at 2 litro para sa mga babae.

Sinubaybayan ang antas ng hydration ng mga kalahok sa loob ng isang linggo bago sila isinailalim sa isang stress test na binubuo ng isang sorpresang job interview at mental arithmetic challenge sa harap ng isang panel.

Ayon sa mga saliva samples na kinolekta bago at pagkatapos ng pagsubok, mas malaki ang itinaas ng cortisol levels sa grupo ng mga kulang sa tubig.

Ayon kay Neil Walsh mula sa School of Sport and Exercise Sciences ng unibersidad:

“Ang mga taong may mababang fluid intake at hindi nakakasunod sa rekomendadong dami ng tubig ay malamang na hindi sapat ang hydration. Pero hindi namin alam noon kung, kapag na-stress sila sa kontroladong kondisyon, ay magkakaroon sila ng mas matinding stress hormone response.”

Bagamat parehong nakaranas ng pagtaas ng heart rate at antas ng nerbiyos ang dalawang grupo, tanging ang kulang sa tubig ang nagpakita ng mas matinding cortisol response.

Babala ni Walsh, ang labis na cortisol response ay maaaring maiugnay sa pangmatagalang panganib sa kalusugan gaya ng sakit sa puso, diabetes, at depresyon.

“Kung alam mong may paparating kang deadline o kailangang magsalita sa harap ng madla, ang pagkakaroon ng bote ng tubig ay isang simpleng gawi na maaaring makatulong sa iyong pangmatagalang kalusugan,” dagdag niya. Philippine News Agency