PATAY ang 34-anyos na pahinante ng truck nang barilin ng kumatok sa pintuan ng kanilang bahay sa Brgy. Bitin, Bay, Laguna noong Miyerkules.

Nasawi ang biktima na si alyas Eugene dahil sa dalawang tama ng bala ng hindi pa batid na kalibre ng baril mula sa nakatakas at hindi nakilalang suspek.

Ayon sa ulat ng Bay police kay Laguna Provincial Director P/Col. Ricardo Dalmacia, dakong alas-9:15 ng gabi binaril ang biktima.

Ayon sa imbestigasyon, nasa loob ng bahay ang biktima nang biglang dumating ang suspek saka kumatok sa pintuan ng bahay.

Matapos mabuksan ang pinto, mabilis na pinaputukan ang biktima ng suspek.

Sakay ng itim na Ford Everest ang suspek na tumakas sa gawi ng Sto. Tomas, Batangas.