𝗕𝗜𝗡𝗜𝗕𝗜𝗚𝗬𝗔𝗡𝗚 𝗶𝗺𝗽𝗼𝗿𝘁𝗮𝗻𝘀𝗶𝘆𝗮 𝗼 𝗽𝗿𝗮𝘆𝗼𝗿𝗶𝗱𝗮𝗱 𝗻𝗶 𝟭-𝗣𝗔𝗖𝗠𝗔𝗡 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗠𝗶𝗰𝗵𝗮𝗲𝗹 “𝗠𝗶𝗸𝗲𝗲” 𝗟. 𝗥𝗼𝗺𝗲𝗿𝗼,𝗣𝗵.𝗗., 𝗮𝗻𝗴 𝗲𝗱𝘂𝗸𝗮𝘀𝘆𝗼𝗻 𝗻𝗴 𝗹𝗶𝗯𝗼-𝗹𝗶𝗯𝗼𝗻𝗴 𝗸𝗮𝗯𝗮𝘁𝗮𝗮𝗻 𝗸𝗮𝘆𝗮 𝗽𝘂𝘀𝗽𝘂𝘀𝗮𝗻 𝗮𝗻𝗴 𝗽𝗮𝗴𝘀𝗶𝘀𝗶𝗸𝗮𝗽 𝗻𝗴 𝗺𝗮𝗺𝗯𝗮𝗯𝗮𝘁𝗮𝘀 𝗻𝗮 𝗺𝗮𝗸𝗮𝗽𝗮𝗺𝗮𝗵𝗮𝗴𝗶 𝗻𝗴 𝘀𝗰𝗵𝗼𝗹𝗮𝗿𝘀𝗵𝗶𝗽 𝗼 𝗹𝗶𝗯𝗿𝗲𝗻𝗴 𝗲𝗱𝘂𝗸𝗮𝘀𝘆𝗼𝗻 𝗽𝗮𝗿𝗮 𝘀𝗮 𝗹𝗮𝗵𝗮𝘁 𝗻𝗴 𝗺𝗮𝗴-𝗮𝗮𝗿𝗮𝗹 𝘀𝗮 𝗯𝗮𝗻𝘀𝗮.

Ayon kay Romero, chairman ng House Committee on Poverty Alleviation, isa sa kaniyang mga adbokasiya ay ang mabigyan ng nararapat na tulong ang libo-libong mag-aaral na walang kakayahang makapag-aral dulot ng kahirapang nararanasan ng kanilang pamilya.

Sinabi ni Romero na ang isa sa mga programa at proyektong isinusulong ng 1-PACMAN Party List ay ang maiayos ang kalagayan o estado ng edukasyon sa bansa sa gitna ng maraming kabataang estudyante ang hindi nakakapag-aral dulot ng kasalukuyang krisis. Habang ang iba naman ay napapariwara dahil sa impluwensiya ng masamang bisyo gaya ng illegal na droga at sugal.

Nabatid pa kay Romero na sa pamamagitan ng programang “Iskolar ako ni Cong. Mikee” nakapagpatayo rin siya ng mga paaralan sa iba’t-ibang bahagi ng bansa. Kabilang na dito ang pagpapatayo ng Del Pilar Elementary School Building sa Barotac Viejo, Iloilo at sa iba pang lalawigan.

Sabi ng kongresista, hindi maisasakatuparan ang kaniyang proyekto sa Iloilo kung walang suporta mula kina Mayor Bongbong Tupas at Congressman Raul Tupas na tumulong sa kaniya para maipatayo ang Del Pilar Elementary School.

“Nagpapasalamat tayo sa suporta at maayos na partnership kasama sina Mayor Bongbong Tupas at Congressman Raul Tupas. Isa sa ating adbokasiya ay ang aysuin ang estado ng edukasyon sa bansa,” wika ni Romero.

Kasabay nito, inihayag din ni Romero na tinatayang 100 kabataang estudyante ang napagkalooban na ng maayos at de-kalidad na edukasyon at mayroong maayos na paaralan.