ARESTADO ang isang lalaki noong Lunes dahil sa pagpatay sa 84-anyos na lolang nakaratay sa kama na ginahasa niya sa loob ng isang bahay sa Floridablanca, Pampanga.

Sa ulat kay PRO3 director Brig. Gen. Redrico Maranan, kinilala ng Pampanga police director Col. Jay Dimaandal ang suspek na si 26-anyos, ng Barangay San Nicolas, Floridablanca, Pampanga.

Lumalabas sa inisyal na imbestigasyon na pinasok ng suspek ang bahay ng biktima sa Bgy. San Nicolas at nagnakaw ng dalawang cellphone at wallet.

Habang paalis ng bahay ay nakita ng suspek ang nakaratay na matandang babae at saka ito hinalay.

Nakipambuno ang matandang babae sa suspek, na walang habas na pinagsasaksak ang biktima hanggang ito ay mamatay.

Agad namang ipinaalam ng pamilya ng biktima ang malagim na pangyayari sa mga opisyal ng barangay, na nagsumbong sa Floridablanca police.

Naglunsad ng mabilis na operasyon ang mga pulis na nagresulta sa pagkakaaresto sa suspek at nakuha rin ang mga bagay na ninakaw niya sa bahay ng biktima.

Nakatakdang sampahan ng kasong robbery at rape with homicide ang suspek.