𝗕𝗜𝗟𝗔𝗡𝗚 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗤𝘂𝗮𝗱 𝗖𝗼𝗺𝗺𝗶𝘁𝘁𝗲𝗲,i𝗽𝗶𝗻𝗮𝗵𝗮𝘆𝗮𝗴 𝗻𝗶 𝗦𝘂𝗿𝗶𝗴𝗮𝗼 𝗱𝗲𝗹 𝗡𝗼𝗿𝘁𝗲 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗯𝗲𝗿𝘁 𝗔𝗰𝗲 𝗦. 𝗕𝗮𝗿𝗯𝗲𝗿𝘀 𝗻𝗮 𝗽𝗮𝘂𝗻𝘁𝗶-𝘂𝗻𝘁𝗶 𝗻𝗴 𝗻𝗮𝗯𝘂𝗯𝘂𝗻𝗴𝗸𝗮𝗹 𝗮𝗻𝗴 𝗺𝗴𝗮 𝗶𝘁𝗶𝗻𝗮𝘁𝗮𝗴𝗼𝗻𝗴 𝗹𝗶𝗵𝗶𝗺 𝗼 𝗺𝗴𝗮 𝗸𝗮𝗯𝘂𝗹𝗮𝘀𝘁𝘂𝗴𝗮𝗻𝗴 𝗸𝗶𝗻𝗮𝘀𝗮𝗻𝗴𝗸𝘂𝘁𝗮𝗻 𝗻𝗴 𝗱𝗮𝘁𝗶𝗻𝗴 𝗮𝗱𝗺𝗶𝗻𝗶𝘀𝘁𝗿𝗮𝘀𝘆𝗼𝗻 𝘀𝗮 𝗽𝗮𝗺𝗮𝗺𝗮𝗴𝗶𝘁𝗮𝗻 𝗻𝗴 𝗺𝗴𝗮 𝗻𝗮𝗸𝗮𝗴𝗶𝗴𝗶𝗺𝗯𝗮𝗹 𝗻𝗮 𝘁𝗲𝘀𝘁𝗶𝗺𝗼𝗻𝘆𝗮𝗻𝗴 𝗶𝘀𝗶𝗻𝗶𝘀𝗶𝘄𝗮𝗹𝗮𝘁 𝗻𝗴 𝗺𝗴𝗮 𝘁𝗲𝘀𝘁𝗶𝗴𝗼 𝘀𝗮 𝗸𝗮𝗻𝗶𝗹𝗮𝗻𝗴 𝗶𝘀𝗶𝗻𝗮𝘀𝗮𝗴𝗮𝘄𝗮𝗻𝗴 𝗶𝗺𝗯𝗲𝘀𝘁𝗶𝗴𝗮𝘀𝘆𝗼𝗻.

Ayon kay Barbers, bunsod ng mga naganap na pangyayari sa kanilang pagsisiyasat dito umano naisasabuhay ang kasabihang “walang lihim na hindi mabubunyag at walang baho na hindi sisingaw” dahil sa mga rebelasyong inihayag ni Police Col. Jovie Espendido, ang dating hepe ng pulisya sa bayan ng Albuera, Leyte at Ozamiz City sa Misamis Oriental.

Ipinaliwanag ng kongresista na dahil sa mga nakagigitlang rebelasyon ni Espenido hindi maiiwasan na unti-unting nabubungkal at nahahalukay ang mga sikretong ikinukubli ng nakalipas na administrasyong Duterte gaya na lamang ng pag-uugnay ni Espenido kay dating Philippine National Police (PNP) Chief at ngayo’y Senador Ronald “Bato” Dela Rosa bilang protektor o “padrino” ng mga pinaghihinalaang bigtime drug lord.

Bukod dito, sabi pa ni Barbers na nakakaalarma din ang mga naging pahayag ni Espenido na may ilang matataas na opisyal ng PNP ang nagbibigay ng proteksiyon sa mga sindikato ng illegal na droga at mga bigtime drug lords.

Dahil dito, binigyang diin ni Barbers dahil sa masyadong mabibigat at seryoso ang mga naging pagsisiwalat ni Espenido sa Quad Committee, napakahalaga na marinig ang panig nina dating Pangulong Rodrigo Roa Duterte at Sen. Dela Rosa para pasinungalingan o pabulaanan ang mga isinawalat ng nasabing Police official.

Dagdag pa ng mambabatas na isa sa mga masyadong mabigat na akisasyon o testamento ni Espenido ay ang usapin ng mga nangyaring pagpatay sa mga hinihinalang drug users at drug pushers na ayon sa kaniyang pagbubunyag ay mga ordinaryong indibiduwal lamang na nasangkot sa kaso illegal na droga.

Dahil sa mga kaganapang ito, naniniwala si Barbers na marami pang lihim o kontrobersiya ang mahahalukay ng Quad Committee sa pagpapatuloy ng imbestigasyon sa mga darating na araw.