𝗡𝗔𝗡𝗜𝗡𝗜𝗪𝗔𝗟𝗔 𝘀𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗻𝗮 𝗺𝗮𝗹𝗮𝗸𝗶 𝗮𝗻𝗴 𝗽𝗮𝗴-𝗮𝘀𝗮 𝗽𝗮𝗿𝗮 𝗺𝗮𝗱𝗶𝗶𝗻 𝘀𝗮 𝗸𝗮𝘀𝗼 𝗻𝗴 𝗵𝘂𝗺𝗮𝗻 𝗿𝗶𝗴𝗵𝘁𝘀 𝘃𝗶𝗼𝗹𝗮𝘁𝗶𝗼𝗻 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗘𝘅𝘁𝗿𝗮𝗷𝘂𝗱𝗶𝗰𝗶𝗮𝗹 𝗸𝗶𝗹𝗹𝗶𝗻𝗴𝘀 (𝗘𝗝𝗞) 𝗼 𝗺𝗮𝗱𝘂𝗴𝗼𝗻𝗴 “𝘄𝗮𝗿 𝗼𝗻 𝗱𝗿𝘂𝗴𝘀” 𝗮𝗻𝗴 𝗺𝗴𝗮 𝗸𝗶𝗹𝗮𝗹𝗮𝗻𝗴 𝗽𝗲𝗿𝘀𝗼𝗻𝗮𝗹𝗶𝗱𝗮𝗱 𝗻𝗮 𝘀𝗮𝗻𝗴𝗸𝗼𝘁 𝘀𝗮 𝘄𝗮𝗹𝗮𝗻𝗴 𝗵𝗮𝗯𝗮𝘀 𝗮𝘁 𝘄𝗮𝗹𝗮𝗻𝗴 𝗽𝗮𝗸𝘂𝗻𝗱𝗮𝗻𝗴𝗮𝗻𝗴 𝗽𝗮𝗺𝗮𝗺𝗮𝘀𝗹𝗮𝗻𝗴 𝗻𝗮 𝗻𝗮𝗴𝗮𝗻𝗮𝗽 𝘀𝗮 𝗻𝗮𝗸𝗮𝗹𝗶𝗽𝗮𝘀 𝗻𝗮 𝗮𝗱𝗺𝗶𝗻𝗶𝘀𝘁𝗿𝗮𝘀𝘆𝗼𝗻𝗴 𝗗𝘂𝘁𝗲𝗿𝘁𝗲.

Ayon kay Valeriano, chairman ng House Committee on Metro Manila Development, tama ang ibinigay na pahayag ng Chairman ng House Committee on Human Rights na si Manila 4th Dist. Cong. Bienvenido “Benny” M. Abante,Jr. na bagama’t hindi na makakapag-kuwento ang mga naging biktima ng madugong war on drugs, ang mga ebidensiya naman ang magsisiwalat ng buong katotohanan.

Ipinaliwanag ni Valeriano na sa kasong ito pinatutunayan ang kasabihan na “walang lihim na hindi mabubunyag at “hindi nagsisingaling ang ebidensiya.”

Aniya, ang mga nakalap na ebidensiya sa EJK ang magkukuwento ng mga naganap na pangyayari hinggil sa pagkamatay ng maraming biktima na pinaratangang drug pushers o drug users ng mga pulis na mariing itinatanggi naman ng kanilang mga kaanak.

Sinabi pa ni Valeriano na ang tanging layunin lamang ng isinasagawang imbestigasyon ng Committee on Human Rights ay malaman ang katotohanan kung mayroong nangyaring paglabag sa karapatang pantao habang inilulunsad ang madugong war on drugs campaign ni dating Pangulong Rodrigo Roa Duterte na ipinapalagay na maraming inosenteng sibilyan ang napatay ng walang kalaban-laban matapos silang mapagkamalan ng mga pulis na drug pusher at drug user.

Binigyang diin ng Manila solon na nais pairalin ng Kamara de Representantes ang tinatawag na “rule of law” kaya ito ang sisikapin nilang gawin para mapanagot ang mga itinuturong responsable sa naganap na pagpatay at mabigyan ng katarungan ang libo-libong biktima ng EJK.

Sabi pa ni Valeriano, napakahalaga ng buhay ng isang tao. Kaya nararapat lamang na kumilos ang Kongreso upang mapangalagaan ang buhay ng bawat Pilipino sa pamamagitan ng pagkakloob ng proteksiyon ng Estado para sa mga mamamayan na ginagarantiyahan naman ng 1987 Constitution.

Umaapela din ang kongresista sa mamamayan na makipag-tulungan sa isinasagawang imbestigasyon ng Kamara de Representantes upang makamit ang hustisya para sa mga naging biktima ng madugong war on drugs.