MAGANDANG araw sa ating mga kababayan, lalo na sa mga suki natin sa Japan.

Nawa’y nasa mabuti at ligtas kayong kalagayan.

Binabati natin sina Ma. Theresa Yasuki, Mama Aki ng Ihawan, Winger dela Cruz, Glenn Raganas, Patricia Coronel, La Dy Pinky, Endo Yumi, Roana San Jose, Yoshiko Katsumata, Josie Gelo, Hiroki Hayashi, at Hiroshi Katsumata.

Binabati rin natin si Joann de Guzman at mga kasama niya sa Oman; Dolores Monfero, Delia Sunga ng Saudi Arabia.

God bless mga kabayan!

***

Muling binalaan ni Customs Commissioner Ariel F. Nepomuceno ang mga ismagler at kanilang mga protektor sa loob at labas ng gobyerno.

Ipinalabas ni Commissioner Nepomuceno ang matinding babala pagkatapos na makasakote ang Bureau of Customs (BOC) ng misdeclared frozen chicken meat sa Zambales.

Nagkakahalaga ng mahigit P6 milyon, ang shipment, na nanggaling ng Hong Kong, ay natimbog sa BOC-Port of Subic.

Ang mga karne ng manok ay nakalagay sa isang 40-foot container na idineklarang naglalaman ng cooked tofu.

Binuksan ng mga otoridad ang container dahil isang intelligence information na natanggap ng BOC na posibilidad na may laman itong frozen o processed food products at agricultural commodities.

Kaya nang buksan ang container ay tumambad ang “1,380 cartons of frozen chicken meat at 174 cartons of frozen fresh tofu.”

Kaagad na inirekomenda na isyuhan ng warrant of seizure and detention (WSD) order and nasabing shipment dahil sa paglabag sa customs laws and regulations.

“Every interception is a reminder of our responsibility to safeguard legitimate trade and protect the interests of the Filipino people,” ayon kay Port of Subic District Collector Geniefelle P. Lagmay.

Sinabi naman ni Commissioner Nepomuceno na ang BOC ay nananatiling naka-focus sa kanilang mandato.

“Despite the recent personnel movements and internal cleansing efforts at the Port of Subic, I expect our personnel to remain focused on protecting our borders and faithfully carrying out their responsibilities as public servants.”

At dito na sinabi ni Comissioner Nepomuceno na lahat ng lumalabag sa ating mga batas ay huhulihin at papanagutin.

Ang babala ni Nepomuceno ay siguradong may chilling effect sa mga taong nagpapasok ng kontrabando sa bansa.

Pati na ang mga taong tumutulong sa mga ismagler ay kailangang papanagutin.

Hindi nagbibiro si Commissioner Nepomuceno at sinusunod lang niya ang utos ni Pangulong Ferdinand R. Marcos Jr.

Ang utos ay: “Hit hard at all those violating our customs laws, rules and regulations.”

****

Noong Huwebes, Oktubre 1, ay sinira ng Bureau of Customs (BOC) ang mga nasakoteng “illicit vape products” na nagkakahalaga ng P1.4 bilyon.

Ang mga sinirang vape devices at pods ay natimbog ng mga taga-BOC Manila International Container Port (MICP) sa isang warewhouse sa Maynila noong nakaraang Marso.

Sa katunayan, sinabi ni Commissioner Nepomuceno na ito ang “largest single seizure of vape products in a single operation in BOC history.”

Ang March 2026 operation sa nasabing warehouse sa Manila ay isinagawa ng MICP-Customs Intelligence and Investigation Service (CIIS) at Philippine Coast Guard (PCG).

Ang shipment ay binubuo ng 3,174 cartons ng vape devices at pods na walang tax stamps ng Bureau of Internal Revenue (BIR).

Pagkatapos ng examination ay nag-isyu si MICP District Collector Geoffrey K. de Vera IV ng WSD at forfeiture order laban sa shipment.

Sa ngalan ni Finance Secretary Frederick Go, pinuri ni Assistant Secretary Dakila Elfeen Napao ang pagsira sa mga kontrabando.

Sabi ni Napao: “The destruction demonstrated the strong, unyielding resolve of our government to protect public interest by protecting our citizens from potentially hazardous substances.”

Ang mga dumalo sa pagsira sa mga vape devices at pods ay kinabibilangan ng mga taga-DOF, DTI, COA, BIR at PCG.

Para hindi na magamit ang mga vape devices at pods ay dinaanan ang mga ito ng roller compactor bago sabuyan ng tubig.

Ayon naman kay Commissioner Nepomuceno: “Hindi lang naman tariffs, duties at taxes ang usapin dito. Delikado ang mga puslit na produkto dahil hindi sila dumaan sa tamang pagsusuri at regulasyon na maaaring makasama sa kalusugan ng ating mgakababayan.”

****

(Para sa komento at pagbati, mag-texy sa #0917-8624484)