NASABAT ng Bureau of Customs-Port of Clark ang tinatayang P5.4 milyong halaga ng Ecstasy tablets na mula sa Brussels, Belgium.

Isinalang umano sa x-ray scanning ang package at doon nakita ang kahina-hinalang bagay na nakatago sa takip ng karton. Ang package ay idineklarang naglalaman ng speaker.

Nang isailalim sa physical examination ay nasa loob ang isang JBL Bass Booster Speaker at apat na plastik na isiniksik sa gilid ng karton. Naglalaman ang mga plastik ng 3,215 tableta na iba’t iba ang hugis at sukat.

Sa tulong ng Philippine Drug Enforcement Agency (PDEA) ay nakumpirma na Methylenedioxymethamphetamine (MDMA) o Ecstasy ang mga tableta.