MARIING kinondena ni Senate President Pro Tempore Jinggoy Ejercito Estrada ang paggamit ng China ng long-range acoustic device (LRAD) laban sa mga sasakyang-pandagat ng Philippine Coast Guard (PCG). Tinawag niya itong hindi katanggap-tanggap na provokasyon at isang mapaghamon at agresibong taktika.

Binigyang-diin ni Estrada ang masamang epekto ng mga ganitong aksyon, na sinasabing, “Kailanman ay hindi magiging katanggap-tanggap ang pananakot, harassment at pang-aabuso sa ating karapatan lalo na’t nilalagay sa panganib ang mga nagpapatrolya ng ating mga karagatan.”

Idinagdag pa niya na ang ganitong pag-uugali, na maaaring magdulot ng permanenteng pinsala sa pandinig o tenga ng sinuman, ay isang seryosong paglabag sa mga pandaigdigang batas na namamahala sa karagatang pandaigdigan.

Ayon sa ulat ng PCG, ginamit ng China Coast Guard (CCG) vessel 3103 ang LRAD malapit sa baybayin ng Zambales, na nagpalala sa tensyon sa West Philippine Sea.

Hinikayat ni Estrada ang Beijing na itigil ang lahat ng provokasyon sa rehiyon at sumunod sa mga internasyonal na alituntunin. Nananawagan din siya sa pandaigdigang komunidad na suportahan ang Pilipinas sa pagpapatupad ng mga batas pangkaragatan at pagtiyak ng kalayaan sa paglalayag.

Binanggit din ni Estrada ang kahalagahan ng regional defense collaborations, partikular na binigyang-diin ang nalalapit na Talisman Sabre Exercise 2025, ang pinakamalaking joint military exercise sa pagitan ng Australia at Estados Unidos.

“Strengthening our ties with allies and partners through such engagements is vital to maintaining peace and stability in the Indo-Pacific.” ani Estrada.

Ang Talisman Sabre Exercise, isang biennial military training activity, ay sumasalamin sa matibay na ugnayang militar sa pagitan ng Australia at U.S. at layuning pahusayin ang kahandaan ng rehiyon. Para kay Estrada, ang pakikilahok ng Pilipinas dito ay isang mahalagang hakbang sa pagpapalakas ng kakayahan ng bansa na ipagtanggol ang sarili sa harap ng tumitinding alitan sa South China Sea.

Ang mga kamakailang insidente, kabilang ang panliligalig ng Chinese coast guard sa mga sasakyang pangisda ng Pilipinas malapit sa Sandy Cay, ay higit pang nagbigay-diin sa pangangailangan para sa matibay na estratehiyang pangdepensa at multilateral na kooperasyon. Ayon kay Estrada, ang mga pangyayaring ito ay nagpapatibay sa kahalagahan ng matatag na pandaigdigang pakikipag-alyansa para mapanatili ang soberanya sa karagatan at katatagan ng rehiyon.