𝗡𝗔𝗡𝗜𝗡𝗜𝗪𝗔𝗟𝗔 𝗮𝗻𝗴 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗧𝗼𝘂𝗿𝗶𝘀𝗺 𝗻𝗮 𝘀𝗶 𝗥𝗼𝗺𝗯𝗹𝗼𝗻 𝗟𝗼𝗻𝗲 𝗗𝗶𝘀𝘁. 𝗥𝗲𝗽. 𝗘𝗹𝗲𝗮𝗻𝗱𝗿𝗼 𝗝𝗲𝘀𝘂𝘀 “𝗕𝘂𝗱𝗼𝘆” 𝗙. 𝗠𝗮𝗱𝗿𝗼𝗻𝗮 𝗻𝗮 𝗮𝗻𝗴 𝗽𝗮𝗴𝗶𝗴𝗶𝗻𝗴 “𝗔𝘀𝗶𝗮’𝘀 𝗟𝗲𝗮𝗱𝗶𝗻𝗴 𝗗𝗶𝘃𝗲 𝗗𝗲𝘀𝘁𝗶𝗻𝗮𝘁𝗶𝗼𝗻” 𝗻𝗴 𝗣𝗶𝗹𝗶𝗽𝗶𝗻𝗮𝘀 𝗮𝗻𝗴 𝘂𝗻𝘁𝗶-𝘂𝗻𝘁𝗶𝗻𝗴 𝗻𝗮𝗴𝗽𝗮𝗯𝗮𝗻𝗴𝗼𝗻 𝘀𝗮 𝗱𝗮𝘁𝗶𝗻𝗴 𝗻𝗮𝗴𝗵𝗶𝗵𝗶𝗻𝗴𝗮𝗹𝗼𝗻𝗴 𝘁𝘂𝗿𝗶𝘀𝗺𝗼 𝗻𝗴 𝗯𝗮𝗻𝘀𝗮 𝗯𝘂𝗻𝘀𝗼𝗱 𝗻𝗴 𝗽𝗮𝗺𝘂𝗺𝘂𝗸𝘀𝗮 𝗻𝗴 𝗖𝗢𝗩𝗜𝗗-𝟭𝟵 𝗽𝗮𝗻𝗱𝗲𝗺𝗶𝗰.

Ayon kay Madrona, nakakagalak at nakakataba ng puso ang pagkilala sa Pilipinas bilang pangunahing destinasyon ng turismo sa Asya partikular na sa larangan ng diving sa pamamagitan ng nakamit nitong tagumpay sa 31st World Travel Awards (WTA).

Sabi ni Madrona na sa kauna-unahang pagkakataon ay nag-host ang Pilipinas ng prestisyosong travel and tourism awards gala ceremony. Aniya, ito ay isang natatanging pagkilala sa mga pagsisikap ng Department of Tourism (DOT) at Tourism Promotions Board (TPB) Philippines.

Dagdag pa ng kongresista na isang napakalaking karangalan sapagkat kinilala at pinarangalan ang Pilipinas bilang Asia’s Leading Dive Destination sa ikaanim na magkakasunod na taon mula pa noong 2019. Kasabay nito, nakuha rin ng bansa ang mga titulo bilang Asia’s Leading Beach Destination at nangungunang Isla sa Asya.

Ipinaliwanag pa ni Madrona na dahil sa pagkilalang ito, ito rin ang nagtulak upang dayuhin ng napakaraming turista ang mga dive destinations at magagandang beaches sa Pilipinas na nagbigay ng napakalaking ganansiya sa kaban ng pamahalaan.

Pinapurihan din ng mambabatas si Tourism Sec. Maria Christina Garcia Frasco bunsod ng espesyal na parangal na ibinigay sa kaniya na kumikilala sa mga magagandang achievements nito sa pagsusulong at pagpapaunlad ng Philippine tourism.