NALANSAG ng mga pulis ang grupong pinaghihinalaang sangkot sa ilegal na droga nang maaresto ang lider at limang miyembro ng grupo sa Paranaque City noong Sabado.

Dinampot ng mga tauhan ni Southern Police District (SPD) District Director P/BGen. Manuel Abrugena sina alyas Anne, Maite, 45; Donna, 31; Peter, 28; Darwin, 47; at Jeffrey, 33, na pawang residente ng naturang lungsod.

Nahuli sila sa buy-bust laban kay Anne bandang alas-5:30 ng hapon ng mga tauhan ng Paranaque Police Station Drug Enforcement Unit (SDEU) na pinamunuan ni P/Capt. Luis Gazzingan, Jr. sa Brgy. Don Bosco.

Nasamsam ng pulisya sa grupo ang 50 gramo ng shabu na nagkakahalaga ng P340,000, dalawang mobile phones at iba’t-ibang drug paraphernalia.