PATULOY ang search and rescue operations sa mga apektadong residente ng Talisay, Batangas ng Police Regional Office (PRO) 4A sa pangunguna ng hepe nito na si P/BGen. Paul Kenneth Lucas.

Nasalanta ang lugar ng bagyong Kristine at nagdulot ng malawakang pagbaha, pagguho ng lupa at malaking pinsala sa mga ari-arian.

Ipinakita ng mga pulis na hindi sila nagpapabaya at may malasakit. Sa kanilang pagsisikap, nakapaghatid sila ng tulong at suporta sa mga kababayang naapektuhan, kabilang ang pagbibigay ng pagkain, gamot at iba pang pangunahing pangangailangan.

Nakiramay sa mga pamilya ng mga nasawi at naapektuhan ng bagyo ang mga pulis.

“Nais naming ipahayag ang aming taos-pusong pakikiisa sa kanilang pagdadalamhati. Sa mga panahong ito ng pagsubok, sama-sama tayong bumangon at magtulungan upang maibalik ang normal na takbo ng buhay sa ating mga komunidad,” sabi ng PRO-4A.