Pumatay sa 2-anyos na bata nasilo sa Pampanga

Bernard Galang Apr 4, 2025
15 Views

NAARESTO noong Biyernes ang lalaking pinaghihinalaang sumaksak at nakapatay sa 2-anyos na anak ng kanyang live in partner sa Brgy. San Roque Dau 1st, Lubao, Pampanga.

Sa ulat kay Police Regional Office (PRO)-3 chief Brig. Gen. Jean Fajardo, kinilala ni Pampanga police director Col. Jay Dimaandal ang suspek na si alyas Ram, 28.

Inaresto ng mga miyembro ng Lubao police, Pampanga Police Intelligence Unit at Pampanga police ang suspek sa pinagtataguang bahay nito sa operasyon sa Brgy. San Roque.

Ayon sa ulat, sinakal ng suspek ang live in partner niyang si Princess, 23, kaya tumakbo palabas ng bahay ang babae.

Nabaling ang galit ng suspek sa 2-anyos na lalaki at binugbog ang bata.

Pag-uwi ng babae, nakita niya ang bata na nakahandusay sa sahig at nang subukan nitong buhatin ay pinagsasaksak sila ng suspek at tinamaan ang tiyan ng bata.

Isinugod ng mga kapitbahay nila sa Diosdado P. Macapagal Memorial Hospital sa Guagua, Pampanga ang bata kung saan ito idineklarang dead-on-arrival.

Nadakip din ng mga arresting officer ang isang alyas Ronald na nagtago sa suspek sa kanyang bahay kaya mahaharap si Ronald sa kasong obstruction of justice.

Kakasuhan ang suspek ng homicide, attempted homicide at paglabag sa RA 9262.