NADAGDAGAN ang bilang ng pamilyang Pilipino na naranasan na walang makain sa nakalipas na tatlong buwan, ayon sa survey ng Social Weather Station (SWS).

Sa survey na isinagawa mula Abril 19 hanggang 27, umakyat sa 12.2 porsyento o 3.1 milyong pamilyang Pilipino ang nakaranas na walang makain.

Mas mataas ito sa 11.8 porsyento o tinatayang 3.0 milyong pamilyang Pilipino na naitalang nakaranas na magutom sa survey noong Disyembre 2021 at sa 10 porsyento o tinatayang 2.5 milyong pamilyang Pilipino sa survey noong Setyembre 2021.

Mas mababa naman ito sa 13.1 porsyento na siyang annual average noong 2021.

Kinuha sa survey ang opinyon ng 1,400 respondents na edad 18 taong gulang pataas. Mayroon itong sampling error margin na ±2.6 porsyento.