𝗜𝗡𝗔𝗞𝗨𝗦𝗔𝗛𝗔𝗡 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝘀𝗶 𝗩𝗶𝗰𝗲-𝗣𝗿𝗲𝘀𝗶𝗱𝗲𝗻𝘁 𝗜𝗻𝗱𝗮𝘆 𝗦𝗮𝗿𝗮 𝗗𝘂𝘁𝗲𝗿𝘁𝗲 𝗻𝗮 𝗮𝗻𝗴 𝘁𝗼𝘁𝗼𝗼𝗻𝗴 𝗽𝗶𝗻𝗮𝗴𝗹𝗶𝗹𝗶𝗻𝗴𝗸𝘂𝗿𝗮𝗻 𝗻𝗶𝘁𝗼 𝗮𝘆 𝗵𝗶𝗻𝗱𝗶 𝗮𝗻𝗴 𝗺𝗮𝗺𝗮𝗺𝗮𝘆𝗮𝗻𝗴 𝗣𝗶𝗹𝗶𝗽𝗶𝗻𝗼 𝗸𝘂𝗻𝗱𝗶 𝗮𝗻𝗴 𝗺𝗴𝗮 𝗖𝗵𝗶𝗻𝗲𝘀𝗲 𝗻𝗮𝘁𝗶𝗼𝗻𝗮𝗹𝘀 𝗻𝗮 𝗻𝗮𝗴𝗽𝗮𝘀𝗼𝗸 𝗮𝘁 𝗻𝗮𝗴𝗽𝗮𝘀𝗶𝗺𝘂𝗹𝗮 𝗻𝗴 𝗣𝗵𝗶𝗹𝗶𝗽𝗽𝗶𝗻𝗲 𝗢𝗳𝗳𝘀𝗵𝗼𝗿𝗲 𝗚𝗮𝗺𝗶𝗻𝗴 𝗢𝗽𝗲𝗿𝗮𝘁𝗼𝗿𝘀 (𝗣𝗢𝗚𝗢) 𝗱𝗶𝘁𝗼 𝘀𝗮 𝗣𝗶𝗹𝗶𝗽𝗶𝗻𝗮𝘀.

Ang paratang ni Valeriano ay nakapaloob sa kaniyang privilege speech sa Plenaryo ng Kamara de Representantes matapos nitong ipahayag na tila hindi ang interes at kapakanan ng mga Pilipino ang pinagsisilbihan ng Pangalawang Pangulo, bagkos, ang interes at kapakanan ng mga Intsik na promotor ng illegal POGO sa bansa.

Nag-ugat ang akusasyon ni Valeriano laban kay VP Sara makaraang hindi nito sagutin ng matino ang sunod-sunod na katanungan ng mga kongresista patungkol sa kung papaano at saan ginastos ng Office of the Vice-President (OVP) ang pondo nito noong taong 2022, 2023 at 2024.

“Sino ba talaga ang boss at pinaglilingkuran ni Vice-President Sara Duterte? Baka naman ang totoo niyang boss ay hindi ang mga Pilipino. Baka naman ang kaniyang boss ay ang mga promotor ng POGO, mga kawatan, mga drug traffickers. Baka naman ang boss niya ay ang mga humaharang sa bangka ng mga Pilipinong mangingisda,” sabi nito sa kaniyang privilege speech.

Nauna ng hinamon ng kongresista si VP Sara Duterte na magpaliwanag at maglabas ng mga katibayan kung papaano nito ginastos ang tinatayang nasa bilyon pisong pondo na ipinagkatiwala sa OVP na di-umano’y ginamit nila para aa “socio-economic programs” ng kaniyang tanggapan.

Pagdidiin pa ni Valeriano na kaya hindi maipaliwanag ni VP Sara kung saan napunta ang pondo ng OVP ay dahil mabubuking siya ng mga kongresista na nilustay lamang nito ang naturang pondo sapul ng siya ang maluklok noong 2022 hanggang 2024.