𝗜𝗚𝗜𝗡𝗜𝗚𝗜𝗜𝗧 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗻𝗮 𝗺𝗮𝘀𝘆𝗮𝗱𝗼𝗻𝗴 𝗮𝗯𝗮𝗹𝗮 𝘀𝗶𝗹𝗮𝗻𝗴 𝗺𝗴𝗮 𝗸𝗼𝗻𝗴𝗿𝗲𝘀𝗶𝘀𝘁𝗮 𝗮𝘁 𝘄𝗮𝗹𝗮 𝗿𝗶𝗻 𝘀𝗶𝗹𝗮𝗻𝗴 𝗽𝗮𝗻𝗮𝗵𝗼𝗻 𝗽𝗮𝗿𝗮 𝘁𝘂𝘁𝘂𝗸𝗮𝗻 𝗼 𝗸𝗮𝘆𝗮 𝗮𝘆 𝗺𝗮𝗴-𝗳𝗼𝗰𝘂𝘀 𝘀𝗮 𝗽𝗮𝗴𝗵𝗮𝗵𝗮𝗶𝗻 𝗻𝗴 𝗶𝗺𝗽𝗲𝗮𝗰𝗵𝗺𝗲𝗻𝘁 𝗰𝗼𝗺𝗽𝗹𝗮𝗶𝗻𝘁 𝗹𝗮𝗯𝗮𝗻 𝗸𝗮𝘆 𝗩𝗶𝗰𝗲-𝗣𝗿𝗲𝘀𝗶𝗱𝗲𝗻𝘁 𝗜𝗻𝗱𝗮𝘆 𝗦𝗮𝗿𝗮 𝗗𝘂𝘁𝗲𝗿𝘁𝗲 𝗴𝗮𝘆𝗮 𝗻𝗴 𝗻𝗮𝗶𝘀 𝗻𝗶𝘁𝗼𝗻𝗴 𝗽𝗮𝗹𝗮𝗯𝗮𝘀𝗶𝗻.

Ito ang depensa ni Valeriano, chairman ng House Committee on Metro Manila Development, patungkol sa pahayag at alegasyon ni Vice-President Duterte na mayroon umanong ikinakasa o nilulutong impeachment complaint ang liderato ng Kamara de Representantes laban sa kaniya batay sa impormasyong nakarating sa kaniya.

Ayon kay Valeriano, sa kasalukuyang panahon ng budget season o ang ginagawang pagtalakay ng Kongreso sa 2025 proposed national budget. Ang lahat ng mga kongresista ay abalang-abala sapagkat nais nilang himayin at suriing mabuti ang budget proposal na isinusumite ng bawat ahensiya ng gobyerno.

Dahil dito, binigyang diin ng kongresista ano pa ang magiging panahon nila para mag-focus sa di-umano’y impeachment complaint laban sa Pangalawang Pangulo gayong ang buong oras at panahon nila ay nakatutok sa kani-kanilang trabaho. Bukod pa ang pagtutok nila sa mga Committee hearings.

Dahil dito, naniniwala si Valeriano na maaaring kumukuha lamang ng simpatya si VP Sara mula sa mga tao o kaya naman ay “pa-victim” ito na ang layunin ay malihis ang mga isyu laban sa kaniyang pamilya na unti-unting sumasambulat sa isinasagawang imbestigasyon ng Quad Committee ng Kamara de Representantes.

“Masyadong kaming abala para tutukan ang impeachment complaint against VP Sara. Lubhang naka-focus kasi kami sa aming mga trabaho. Baka naman ang mga ganitong alegasyon ay pagkuha lang ng simpatya mula sa mga tao at pa-victim siya,” paliwanag ni Valeriano.

Kinatigan din ni Valeriano ang hamon ng mga kapwa nito kongresista kay VP Sara na tukuyin at pangalanan kung sino ang nagsabi sa kaniya ng “chismis” o “nag-maritess” na mayroong inihahandang impeachment complaint ang liderato ng Kamara de Representantes laban sa kaniya.

Muling inigiit ni Valeriano na hindi totoo at wala aniyang basehan ang mga kuwentong nakakarating sa Pangalawang Pangulo at maaaring ito ay isang fake news lamang na ang layunin ay sulsulan o kaya gatungan siya.