VIRAL sa social media ang insidente ng pananaksak sa isang 16-anyos na binatilyo nitong Sabado ng hapon sa isang park sa Barangay Greater Lagro, Fairview, Quezon City.

Ayon sa Quezon City Police District (QCPD), grupo ng mga menor de edad o children in conflict with the law (CICL) ang umano’y umatake sa biktima. Mabilis namang naisugod sa Tala Hospital sa Caloocan City ang binatilyo at nasa stable na kondisyon na ito.

Sa inisyal na imbestigasyon, isang menor de edad na saksi ang nagsabi na kapwa nila menor de edad din ang sumaksak sa pulisya.

Ayon sa pulisya, naghahanda na ng kaso laban sa suspek habang patuloy ang imbestigasyon para makilala at madakip ang iba pang sangkot sa pananaksak.

Mariing kinondena ng QCPD ang insidente at iginiit ang kahalagahan ng ligtas na kapaligiran para sa mga kabataan. Patuloy umano ang pakikipag-ugnayan ng pulisya sa komunidad at mga kaukulang ahensya upang maiwasan ang mga karahasang kinasasangkutan ng kabataan.