Handang makipagpulong ang ABS-CBN sa Movie and Television Review and Classification Board (MTRCB) kaugnay ng mga reklamong natanggap ng ahensya laban sa ilang eksena at interaksyon sa Pinoy Big Brother: Collab 3.0.

Sa pahayag nitong Nobyembre 13, sinabi ng ABS-CBN na wala pa silang natatanggap na pormal na abiso mula sa MTRCB hinggil sa mga reklamo. Gayunman, bukas ang network na makilahok sa mga talakayan sa Board sakaling ipatawag.

Binigyang-diin din ng ABS-CBN na patuloy na itinataguyod ng PBB ang positibong pagpapahalaga at paggalang sa kapwa. Sa pamamagitan ng paggabay ni Kuya, hinihikayat ang mga housemate na pagnilayan ang kanilang mga kilos at matuto mula sa kanilang mga karanasan.

Dagdag pa ng network, nananatiling pangunahing prayoridad ang kapakanan ng mga housemate at ang responsableng self-regulation ng programa.