SUPORTADO ni Manila 2nd Dist. Cong. Rolando “CRV” M. Valeriano ang isinusulong na resolution sa Kamara de Representantes na nagpapahayag ng buong suporta para kay House Speaker Ferdinand Martin Gomez Romualdez sa gitna ng maiigting at masidhing pagbatikos sa kaniya ng Senado.

Sinabi ni Valeriano, chairman ng House Committee on Metro Manila Development, na isinulong ang resolution bunsod ng sunod-sunod na pag-atake ng mga Senador sa Mababang Kapulungan partikular na kay Speaker Romualdez na may kinalaman sa isinusulong na Charter Change (Cha-Cha).

Ipinaliwanag ni Valeriano na nakasaad sa House Resolution ang hindi matatawarang pagkakaisa at suporta ng mga kongresista para kay Speaker Romualdez. Kasabay ng pagtindig sa integridad ng Kamara de Representantes bilang isang institusyon sa gitna ng mga pag-atake dito.

Ayon kay Valeriano, layunin din ng nasabing resolution na mapanatili at mapagtibay ang tinatawag na “principles of interparliamentary courtesy” kabilang na rin dito ang pangangalaga o “safeguarding” ng legislative at constituent function ng Kongreso na naaantala dahil sa mga pagbatikos.

Ikinatuwiran pa ng kongresista na hindi intensiyon ng Kamara na palalain ang hidwaan sa pagitan ng Mababang Kapulungan at Senado. Bagkos, para solusyunan ang hindi pagkakaintindihan patungkol sa usapin ng Cha-Cha na magbibigay-daan para sa pag-amiyenda sa Konstitusyon.