NAGSALITA ang anak ni Presidente Rodrigo “Digong” Duterte na si “Baste” Duterte na maaring si presidential frontrunner Bongbong Marcos ang iendorso ng kaniyang ama base umano sa mga “signs” na iniiwan ng Pangulo.

Matapos ang proclamation rally ng mga lokal na kandidato sa Polomolok, South Cotabato, ayon sa bise-alkalde ng Davao City na si Baste, hindi pa tiyak ang pag-endorso ng kaniyang ama kay Bonbong pero aniya “…but there are signs na. Nakita na natin [ang] PDP-Laban, nag-release na ng statement na they’re supporting BBM (Bongbong Marcos) so I hope the President will express his support to BBM.”

Giit pa ni Baste, si Bongbong ang nais niya na iendorso ng kaniyang ama sa pagkapangulo. At si Bongbong din daw ang nangungunang pambato ng kaniyang mga kakabayan sa Davao base sa mga datos ng isinagawang mga survey.

“As far as I know sa Davao mataas talaga siya. More than 80 percent, 85 percent. We’re trying to push for 90,” dagdag pa ni Baste.

Ang kapatid ni Baste na ngayo’y alkalde ng Davao City na si inday Sara Duterte ang katambal ni Bongbong na tumatakbo namang bise presidente. Ang tambalang ito na binansagang “Uniteam” ang kasalukuyang nangunguna ayon sa pinakahuling Pulse Asia survey.