MAAARING kausapin ni Pangulong Ferdinand “Bongbong” Marcos Jr. si death row convict Mary jane Veloso oras na dumating sa bansa mula Indonesia.

Ayon kay Executive Secretary Lucas Bersamin, isa sa mga posibilidad na mag-usap sina Pangulong Marcos at Veloso.

“Hindi ko lang alam pero siguro naman, that’s one of the possibilities,” pahayag ni Bersamin.

Pero sa ngayon, premature pa aniya na pag-usapan kung bibigyan ng presidential pardon ni Pangulong Marcos si Veloso.

Mas makabubuti aniya na dumating muna sa bansa si Veloso bago gumawa ng ano mang desisyon.

Matatandaang pinayagan ng pamahalaan ng Indonesia na ilipat na sa kostudiya ng Pilipinas si Veloso.

Naaresto si Veloso sa Indonesia noong 2010 dahil sa pagdadala ng illegal na droga.