HINDI pa nahahanap ang 11-taong gulang na batang lalaki na nalunod sa ilog habang malakas ang ulan noong Sabado sa Caloocan City.

Inatasan ni Mayor Dale Gonzalo “Along” Malapitan ang mga tauhan ng City Disaster Risk Reduction and Management Department (CDRRMD) na huwag tigilan ang paghahanap sa biktima hangga’t hindi natatagpuan ang katawan nito.

Ayon sa report, nadulas at nahulog ang bata sa Creek Side na malapit sa NHC Elementary School sa Brgy. 186 sa kasagsagan ng ulan.

Pahirapan ang paghahanap ng mga awtoridad, kasama na ang Philippine Coast Guard (PCG) at Barangay Rescue, bunga ng pabugso-bugsong ulan at zero visibility sa ilog.

Tiniyak ng CDRRMD na hindi sila titigil sa paghahanap sa katawan ng bata hangga’t hindi ito nakikita.