PINURI ni Pangulong Donald Trump ng Estados Unidos si Pangulong Ferdinand R. Marcos Jr. sa kanilang unang personal na pagkikita na ginanap sa White House nitong Martes.

Si Trump, na nasa kanyang ikalawang termino bilang pangulo matapos magsilbi mula 2017 hanggang 2021, ay paulit-ulit na nagsabing isang malaking karangalan ang pagbisita ni Pangulong Marcos.

“Isang dakilang karangalan ang makasama si Pangulong Ferdinand Marcos Jr. ng Pilipinas. Dakilang pamilya, may dakilang pamana, at lubos na iginagalang sa kanyang bansa,” ani Trump sa isang live na press conference kasama si Pangulong Marcos sa loob ng Oval Office ng White House bago ang opisyal na bilateral meeting.

“Alam ko ‘yan dahil marami akong kaibigan sa Pilipinas. May malaking respeto—kung wala, hindi ko ito masasabi, kaya binabati kita,” dagdag pa ni Trump.

Nagpasalamat naman si Pangulong Marcos sa kanyang Amerikanong katapat sa muling pagpapatibay ng matatag na alyansang militar sa pagitan ng dalawang bansa.

“Sa palagay ko ay mahalagang alalahanin na si Pangulong Trump ang unang tumawag sa relasyon ng Pilipinas at Estados Unidos bilang ‘ironclad’ noong kanyang unang termino. At iyon ay nanatiling totoo mula noong inilahad ninyo ang pahayag na iyon, ginoo. Isa ito sa mga bagay na laging pahahalagahan ng Pilipinas,” ani Pangulong Marcos.

Nagpasalamat din si Trump kay Pangulong Marcos sa muling pagpapatatag ng alyansa, at tinawag ang Pilipinas na isang “napakahalagang bansa sa usaping militar.”

“At nais ko lang kayong pasalamatan sa inyong pagbisita. Isang napakalaking karangalan, kayo at ang inyong mga kinatawan. Tunay na isang malaking, malaking karangalan,” diin pa ni Trump.

Nagtapos ang tatlong-araw na opisyal na pagbisita ni Pangulong Marcos sa Washington, D.C. nitong Martes.

Si Pangulong Marcos ang naging kauna-unahang pinuno mula sa Timog-Silangang Asya na inanyayahan ni Pangulong Trump matapos muling mahalal noong Nobyembre, na nagpapakita ng lalong lumalalim na ugnayan sa pagitan ng Maynila at Washington.