IPINAHAYAG ni Senador Camille Villar na ang serbisyong pangkalusugan ay dapat maging abot para sa lahat ng Pilipino, at ang mga gamutang mahalaga gaya ng dialysis ay hindi dapat mailayo sa sinuman. “Healthcare is a right, not a privilege. Para sa mga kababayan nating lumalaban sa kidney disease, ang dialysis ay hindi dapat mahirap abutin. Tinitiyak ng panukalang ito na walang maiwan, lalo na ang mga higit na nangangailangan,” aniya nang ihain niya ang Dialysis Center Act noong Setyembre 4, 2025.

Itinatadhana ng panukala na lahat ng national, regional, at provincial government hospitals ay magtatayo ng dialysis wards at magbibigay ng libreng gamutan para sa mga indigent na pasyente. Bilang pinakabatang senador ng 20th Congress, pinangunahan din ni Villar ang inagurasyon ng mga bagong CT Scan at MRI machines at isang connecting bridge sa Las Piñas General Hospital and Satellite Trauma Center.

Bilang Vice Chair ng Senate Committee on Health and Demography, sinabi ni Villar na ang mga hakbang na ito ay kaakibat ng kanyang layunin na ilapit ang mga serbisyong pangkalusugan sa mga komunidad upang matiyak na walang Filipino ang maiiwan.

Ayon sa datos, isang Filipino ang namamatay kada oras dahil sa kidney failure, at tumataas ang mga kaso ng humigit-kumulang 15 porsiyento taon-taon. Ang bawat dialysis session ay nagkakahalaga ng ₱2,000 hanggang ₱4,500, at tatlong session kada linggo ang karaniwang kailangan—mahigit ₱13,000 linggu-linggo—isang pasaning hindi kayang tustusan ng mga minimum wage earners.

Sa ilalim ng panukala, ang lahat ng ospital ng pamahalaan ay inaatasang magtayo ng dialysis units sa loob ng dalawang taon, na may libreng gamutan para sa mga indigent na pasyente ayon sa pagtatakda ng Department of Social Welfare and Development (DSWD).

Sa inagurasyon ng Las Piñas General Hospital, binigyang-diin ni Villar ang pagpapalakas ng kapasidad ng mga ospital at inilarawan ang mga bagong pasilidad bilang bahagi ng patuloy na pangakong pampamilya sa pagpapabuti ng public health services. Sinabi niya na ang makabagong CT Scan at MRI machines ay magpapabilis ng diagnosis, magpapahusay sa katumpakan ng paggamot, at magpapahusay ng serbisyo para sa mga pasyente sa Las Piñas at karatig-lugar.

Ayon kay Villar, ang mga inisyatibang ito ay kumakatawan sa mas malawak na adyenda na pinag-uugnay ang batas at imprastraktura upang makabuo ng mas mapagmalasakit at inklusibong sistemang pangkalusugan.

“This is only the beginning. I am committed to pursuing more reforms that will make healthcare a true pillar of national well-being. Every Filipino deserves a fair chance at life,” dagdag niya.