Calendar
Tumulong ang Philippine Coast Guard sa relokasyon ng mga apektadong pamilya sa Barangay Poblacion, San Agustin, Romblon, noong Setyembre 26, 2025. May 18 pamilya, na binubuo ng 79 indibidwal, ang ligtas na nailipat sa mas ligtas na lugar.
Source: Philippine Coast Guard FB
19 naitalang patay sa 3 magkakasunod na bagyo
INIULAT ng National Disaster Risk Reduction and Management Council (NDRRMC) nitong Sabado na 19 katao ang nasawi dahil sa malalakas na hangin at matinding pag-ulan na dulot ng mga tropical cyclone na sina Mirasol, Nando at Opong, pati na rin ng habagat.
Ayon sa ahensya, 18 ang naiulat na nasugatan at 14 ang nawawala, bagaman nilinaw nito na ang bilang ng mga nasawi, nasugatan at nawawala ay sumasailalim pa sa masusing beripikasyon.
Batay sa datos ng NDRRMC, mahigit 520,000 pamilya o higit sa 2 milyong katao ang naapektuhan at napaalis sa kanilang mga tahanan sa 15 rehiyon sa bansa.
Ang mga naapektuhan ay mula sa 57 probinsiya, 504 lungsod at munisipalidad, at 4,219 barangay. Pansamantalang nanunuluyan ang mga lumikas sa 1,906 evacuation centers ng pamahalaan.
Iniulat din ng NDRRMC na halos 408,000 katao mula sa 114,121 pamilya sa Region 1, 2, 3, 4-A, 4-B, 5, 6, Cordillera, Caraga at Negros Island ang isinailalim sa preemptive evacuation.
Bukod dito, 5,202 bahay ang naiulat na nasira, kung saan 708 sa mga ito ay lubusang nawasak, sa Region 1, 2, 3, 4-A, 4-B, 5, 6, 9 at Bangsamoro Autonomous Region in Muslim Mindanao.
Tinatayang halos P915 milyon ang pinsala sa sektor ng agrikultura, bunsod ng 78,267.08 metric tons ng production loss.
Samantala, ang pinsala sa imprastruktura ay tinatayang halos P823 milyon sa Region 1, 2, 4-A, 4-B, 6, 7 at Cordillera.
PNP binabantayan 3,491 evacuation centers
Hanggang alas-12 ng tanghali nitong Sabado, iniulat ng Philippine National Police (PNP) na nagbabantay sila sa kabuuang 3,491 evacuation centers na pinapatakbo ng pamahalaan, kung saan nanunuluyan ang 165,386 pamilya o 589,662 indibidwal.
Inatasan ni acting PNP Chief Lt. Gen. Jose Melencio C. Nartatez Jr. ang pagpapadala ng 7,739 pulis sa mga apektadong lugar, habang 11,118 pulis ang naka-standby para sa posibleng deployment kung kinakailangan.
Ayon kay Brig. Gen. Randulf T. Tuaño, spokesperson ng PNP, naapektuhan din ng bagyo ang 35 pulis sa Region 4-B, 6 at 8. Nasira rin ng malalakas na ulan at hangin ang regional headquarters ng PRO4-B at dalawang istasyon ng pulisya sa Eastern Visayas.
Nagsagawa rin ng search and rescue operations ang PNP, kung saan 6,610 indibidwal ang nailigtas. Dagdag pa ni Tuaño, 328 katao ang stranded sa mga paliparan, habang 4,453 ang stranded sa mga pantalan.
