KINUMPIRMA ni Senate President Vicente “Tito” Sotto III na kabilang si Sen. Erwin Tulfo sa mga kinukunsiderang mamuno sa Blue Ribbon Committee dahil siya umano ang vice chairman nito.

Sa isang Viber group chat ng mga Senate reporters, tinanong si Sotto kung kabilang si Tulfo sa mga kinukunsidera para sa Blue Ribbon Committee at kung bakit.

Tumugon si Sotto: “Yes. Obviously because he is vice chairman.”

Naganap ang palitan ng mensahe habang patuloy na humihingi ng paglilinaw ang midya hinggil sa pamunuan ng Senate Committee on Accountability of Public Officers and Investigations o Blue Ribbon Committee.

Nauna rito, ilang senador umano ang tumangging pamunuan ang komite, kabilang sina Senators JV Ejercito, Risa Hontiveros, Pia Cayetano, Raffy Tulfo, at Francis “Kiko” Pangilinan, ayon kay Sotto.

Dahil dito, pansamantalang nagkaroon ng acting arrangement sa komite habang nagpapatuloy ang pagtalakay sa magiging permanenteng chairman.