SINABI ni House Committee on Public Accounts chairman Terry L. Ridon ng Bicol Saro Party-list na may kapangyarihan ang House Committee on Justice na maglabas ng subpoena para sa mahahalagang dokumentong pinansyal ni Bise Presidente Sara Z. Duterte bilang bahagi ng nagpapatuloy na impeachment proceedings laban sa kanya.

Ayon kay Ridon, maaaring pilitin ng komite ang pagsusumite ng mga dokumentong makakatulong upang matukoy kung ang idineklarang yaman ng Bise Presidente ay tumutugma sa kanyang kinita bilang isang opisyal ng pamahalaan.

“Nasa mandato ng House Committee on Justice ang kapangyarihang mag-subpoena ng lahat ng mga dokumentong may kahalagahan sa impeachment proceedings,” sabi ni Ridon habang kinukumpirma na nagsumite si Duterte ng kanyang Consolidated Answer Ad Cautelam sa House Committee on Justice noong Lunes ng alas-4:30 ng hapon.

Ipinaliwanag niya na maaaring saklaw ng kapangyarihang mag-subpoena ang Statements of Assets, Liabilities and Net Worth (SALNs) ng Bise Presidente, mga bank records, tax returns, at mga dokumento mula sa Securities and Exchange Commission (SEC) na may kaugnayan kay Duterte, sa kanyang asawa, at sa mga negosyong nakalista sa kanyang SALNs.

“Kasama dito ang pag-subpoena ng lahat ng SALNs ng Pangalawang Pangulo, mga bank records, tax returns at SEC documents ng Pangalawang Pangulo, ng kanyang asawa at lahat ng mga negosyo at pinagkakakitaan na nakalagay sa kanyang SALNs,” aniya.

Ipinaliwanag ni Ridon na mahalaga ang mga dokumentong ito upang maikumpara ang idineklarang yaman ni Duterte sa kabuuang sahod na natanggap niya bilang isang opisyal ng pamahalaan.

“Mahalaga ang mga ito para pagbanggain ang kanyang 2024 net worth na P88 milyon at ang tinatayang kabuuang sahod bilang public official mula 2007 hanggang 2024 na nasa P30–40 milyon,” aniya.

Ayon pa sa kanya, kung hindi maipapaliwanag ang pagkakaiba ng dalawang halagang ito sa pamamagitan ng lehitimong kita mula sa negosyo o iba pang legal na pinagmumulan, maaari itong ituring na unexplained wealth sa ilalim ng umiiral na mga batas.

“Kung hindi maipaliwanag ang P50 milyong wealth gap na ito mula sa lehitimong kita mula sa mga negosyo at iba pang pinagkakakitaan, ituturing itong unexplained wealth sa ilalim ng ating batas,” dagdag ni Ridon.

Tinanggihan din ng mambabatas ang mga pahayag na inaabuso ang kapangyarihan sa prosesong ito, at iginiit na bahagi ito ng mga mekanismong nakasaad sa Konstitusyon upang matiyak ang pananagutan ng matataas na opisyal ng pamahalaan.

“Walang pag-abuso at law bending po dito, kundi financial forensics at pagpapatupad lamang ng mga mekanismo ng pagpapanagot sa mga matataas na opisyal ng pamahalaan,” sabi ni Ridon.