INANYAYAHAN ni Mayor April Aguilar ang mga taga-Las Pinas na naghahanap ng trabaho na lumahok sa 124th Labor Day Job Fair sa Biyernes sa Robinsons Place Las Piñas at SM Southmall Las Piñas.

Pamamahalaan ng Public Employment Service Office (PESO) ang magkasabay na job fair mula alas-9:00 ng umaga hanggang alas-3:00 ng hapon.

Aabot sa 20 kompanya ang lalahok sa mega job fair sa Robinsons Place Las Piñas habang 24 na kompanya naman sa SM Southmall Las Piñas.

Ilan sa mga bakanteng posisyon na pwedeng aplayan ang IT customer service representative, data encoder, administrative staff, cashier, sales clerk, promodiser, bagger, warehouseman, stock clerk, service crew, waiter, waitress, kitchen helper at cook.

Pinayuhan ni Vice Mayor Imelda Aguilar ang mga aplikante na magsuot ng malinis at disenteng damit at magdala ng tatlo o higit pang kopya ng updated resume.