HAWAK na ng pulisya ang anim na minor de edad na sangkot umano sa pagpatay sa 14-anyos na lalaki sa Quezon City.

Naglalakad umano ang biktima kasama ang kanyang mga kaibigan sa tapat ng isang supermarket sa Brgy. Doña Imelda, Quezon City nang sugurin sila ng grupo ng mga suspek.

Isa umano sa mga suspek ang sumaksak sa biktima. Dinala ang biktima sa Delos Santos Medical Center subalit hindi na naisalba ng mga doktor ang kanyang buhay.

Nagsagawa ng imbestigasyon ang Galas Police Station (PS 11) at sa tulong ng kuha ng CCTV sa lugar ay nakilala ang mga suspek.

Nakikipag-ugnayan na ang pulisya sa City Social Welfare and Development (CSWD) dahil mga minor de edad ang mga suspek.