PINALAWAK ng Department of Migrant Workers (DMW) ang suporta para sa mga overseas Filipino workers (OFWs) sa paglagda sa kasunduan kasama ang Department of Health (DOH), SteelAsia Manufacturing Corporation at Healthway Medical (AC Health).

Naglunsad din ang ahensya ng guidelines ng “Sa ‘Pinas, Ikaw ang Nurse at Allied Health Professional ng Bayan” (SPINB) Program noong June 30 sa Occupational Safety and Health Center (OSHC), Quezon City.

Pinangunahan nina Migrant Workers Secretary Hans Leo J. Cacdac at Health Secretary Teodoro Herbosa ang pagpirma sa isang Memorandum of Understanding (MOU) na nasaksihan nina DMW Undersecretary Dominique Rubia-Tutay at DOH Director Joel H. Buenaventura.

Layunin ng MOU na palawakin ng kasunduan ang access ng OFWs at kanilang mga pamilya sa quality healthcare services, kasama ang medical repatriation, health and wellness programs, at reintegration ng returning OFW healthcare professionals.

Nilagdaan din ni Secretary Cacdac ang implementing guidelines ng SPINB Program, na nasaksihan nina Sec. Herbosa, Dir. Buenaventura at OWWA Administrator Patricia Yvonne Caunan.

Lumagda naman ang liderato ng DMW at SteelAsia, na nirepresenta nina Chairman at CEO Benjamin Yao, sa isang MOA na nais palawakin ang local employment opportunities para sa returning OFWs.

Maliban sa MOU at MOAs na pinirmahan, ginawaran ng financial assistance sa Health Summit ang 16 na beneficiaries mula sa National Capital Region sa ilalim ng “Sa ‘Pinas, Ikaw ang Ma’am at Sir (SPIMS)”, ang flagship reintegration program ng DMW at Department of Education para sa licensed OFW teachers.