NASABAT ng mga agents ng Bureau of Customs-Ninoy Aquino International Airport (BOC-NAIA) ang parcel noong Hulyo 8 sa loob ng NAIA Complex at natuklasan ang mahigit 2,000 gramo ng pinaghihinalaang methamphetamine hydrochloride o shabu na nagkakahalaga ng mahigit P14 milyon.

Ang kargamento, idineklarang “Plastics and Ropes,” ay na-flag matapos makatanggap ng derogatory information mula sa Philippine Drug Enforcement Agency (PDEA).

Natuklasan ang 2,102 gramo ng pinaghihinalaang shabu na may tinatayang standard value na P14,293,600 na nakatago sa spool ng lubid.

Ang nakumpiskang pinaghihinalaang shabu ay isinailalim sa kustodiya ng PDEA para sa laboratory examination, ayon sa report.

Nananatiling matatag ang BOC-NAIA sa pagsuporta sa misyon ni Commissioner Ariel F. Nepomuceno na palakasin ang seguridad sa hangganan at pigilan ang pagpasok ng ilegal na droga at iba pang ipinagbabawal na kalakal sa bansa.

Muling pinagtitibay ng BOC-NAIA ang kanilang pangako sa patuloy na pagbabantay at mabilis na aksyon laban sa smuggling at iba pang banta sa pambansang ekonomiya.