NAILIGTAS ng mga ahente ng Philippine National Police Anti-Kidnapping Group (PNP-AKG) noong Martes ang isang 37-anyos na negosyanteng Chinese na dinukot sa Angeles City, Pampanga, at naaresto ang apat sa limang suspek na sangkot sa krimen, ayon sa ulat na isinumite kay PNP chief, General Jose Melencio C. Nartatez Jr.

Ayon kay PNP-AKG director Brigadier General Edwin C. Balles, dinukot ang biktima sa harap ng isang supermarket sa kahabaan ng Friendship Highway sa Angeles City noong Linggo ng gabi. Isinagawa ang pagdukot ng limang armadong suspek na sakay ng isang puting van.

“Paalis na ang biktima sa parking area ng supermarket nang harangin ng van ng mga kidnaper ang kanyang daraanan. Pagkatapos ay sapilitan siyang isinakay sa kanilang sasakyan bago tumakas ang mga suspek patungo sa hindi pa matukoy na direksyon,” ani ng opisyal.

Sinabi ni Brig. Gen. Balles na iniulat ng nakababatang kapatid na babae ng biktima ang insidente sa kanilang tanggapan noong Lunes, dahilan upang agad na magsagawa ang PNP-AKG ng masusing imbestigasyon at follow-up operations.

Sa isinagawang imbestigasyon, natuklasan ng PNP-AKG na humihingi ang mga kidnaper ng pantubos na 1 milyong USDT, o humigit-kumulang ₱61 milyon, kapalit ng ligtas na pagpapalaya sa biktima. Ang USDT (USD Tether) ay isang uri ng digital currency o stablecoin na ang halaga ay nakatali sa halaga ng U.S. dollar.

Noong Martes, nagsagawa ang mga operatiba ng PNP-AKG ng anti-kidnapping operation na nagresulta sa ligtas na pagkakasagip sa biktima at pagkakaaresto sa apat na suspek, na binubuo ng tatlong lalaki at isang babae.

Naaresto ang mga pinaghihinalaang kidnaper sa isang hotel sa Pampanga.

Kasalukuyan silang nasa kustodiya ng PNP-AKG sa Camp Crame at sasampahan ng kasong kidnapping with serious illegal detention.

“Talagang kahanga-hanga ang ligtas na pagkakasagip sa biktima sa loob lamang ng dalawang araw, lalo na’t agad ding naaresto ang apat na suspek,” ani ni Brig. Gen. Balles. Pinuri rin niya ang mga opisyal at tauhan ng PNP-AKG at ng mga lokal na yunit ng pulisya na naging bahagi ng matagumpay na operasyon.

Patuloy namang tinutugis ng mga ahente ng PNP-AKG ang ikalimang suspek hanggang sa oras ng paglalathala ng ulat. Sinisiyasat din ng mga imbestigador ang posibilidad na ang mga suspek ay dati umanong may kaugnayan sa mga operasyon ng Philippine Offshore Gaming Operators (POGO) sa bansa.

Ang mga operasyon ng POGO ay tuluyan nang ipinagbawal ni Pangulong Ferdinand R. Marcos Jr. dahil sa mga negatibong epekto nito sa lipunan, kabilang ang pagdami ng mga kaso ng kidnapping-for-ransom na kinasasangkutan ng mga Chinese national bilang mga biktima at suspek noong kasagsagan ng operasyon ng mga ito.

Ayon kay Gen. Nartatez, ang magkakaugnay na anti-kidnapping operation sa Pampanga ay bahagi ng patuloy na pagsisikap ng Philippine National Police na maresolba ang mga krimen sa bansa.