SINABI ng isang opisyal ng National Irrigation Administration (NIA) nitong Martes na ginagamit na ngayon ng ahensya ang teknolohiyang artificial intelligence (AI) sa weather forecasting upang makatulong sa paghula ng antas ng pag-ulan at mabawasan ang epekto ng pagpapakawala ng tubig mula sa mga dam sa mga mabababang lugar.

Sa isang virtual na press briefing, sinabi ni NIA Administrator Eduardo Guillen na sumusunod na ang NIA sa isang protocol sa pagpapakawala ng tubig mula sa mga pangunahing dam tulad ng Angat at Ipo, at nagbibigay abiso ang ahensya sa publiko dalawang hanggang tatlong oras bago ito gawin.

“Mayroon kasing ginagamit ang NIA ngayon na itong ating advanced weather forecasting system na may AI technology. Two weeks nape-predict na po namin kung magre-release kami ng tubig o hindi dito sa ating malalaking dam dito sa Magat and Pantabangan,” ani Guillen.

Binigyang-diin ng NIA Administrator na kinakailangan ang pagpapakawala ng tubig mula sa mga dam upang mapanatili ang integridad ng mga estruktura nito.

Ayon kay Guillen, sa tuwing nagpapakawala ng tubig, sinusunod ng NIA ang isang standard operating procedure na kinabibilangan ng pakikipag-ugnayan sa mga lokal na pamahalaan (LGUs) at pagbibigay ng mga abiso sa social media, na siyang pangunahing plataporma ng ahensya para ipaalam sa mga residente ng mabababang lugar ang nakaambang pagpapakawala.

Dagdag pa ni Guillen, para sa mga pangunahing dam gaya ng Pantabangan, Magat, at Jalaur, nagbibigay na sila ng abiso tungkol sa pagpapakawala ng tubig apat na araw hanggang isang linggo bago ito isagawa.

“May radio station na po ang NIA under ng PBS, so mas maganda na po iyong ating warning forecast, warning system ngayon,” dagdag pa niya.

Sinabi rin ni Guillen na sa kabila ng patuloy na pag-ulan, nakaaaliw ang katotohanang hindi pa kinakailangang magpakawala ng tubig ang mga high dam sa ilalim ng NIA.

Tanging ang Ipo Dam lamang, na nagsu-supply ng inuming tubig sa Metro Manila, ang nakapagpakawala ng tubig sa ngayon, aniya. PCO