INARESTO ng mga operatiba ng Fugitive Search Unit (FSU) ng Bureau of Immigration (BI) ang isang Amerikanong lalaki na nakatala bilang sex offender sa kanyang bansang pinagmulan.

Ang pag-aresto ay alinsunod sa direktiba ni Pangulong Ferdinand “Bongbong” Marcos Jr. na tiyaking protektado ang mga mahihinang sektor ng lipunan laban sa mga dayuhang mandaragit.

Ayon sa batas ng imigrasyon ng Pilipinas, ipinagbabawal ang pagpasok ng mga dayuhang napatunayang may kasong may kinalaman sa moral turpitude, kabilang na ang mga rehistradong sex offender.

Iniulat ni BI FSU Chief Rendel Ryan Sy na ang suspek na si James Russel Munson, 67 taong gulang, ay inaresto noong Miyerkules sa Roxas Boulevard, Ermita, Maynila.

Batay sa impormasyon mula sa Philippine Center on Transnational Crime at mga awtoridad sa Estados Unidos, si Munson ay kinilala bilang isang child sex offender matapos mahatulan sa kasong pang-aabuso sa menor de edad sa unang antas.

Ang pag-aresto ay bahagi ng kampanyang Project #Shieldkids ng BI, isang pinaigting na hakbang laban sa mga sexual predator at mga dayuhang ang presensya ay banta sa seguridad at kaligtasan ng publiko, lalo na sa kapakanan ng mga bata.

Mananatili si Munson sa kustodiya ng BI habang isinasagawa ang proseso ng deportasyon at kalaunan ay ilalagay sa blacklist upang hindi na muling makapasok sa bansa.