ANGELES CITY, Pampanga – Dalawang Amerikanong wanted sa mga kasong paglabag sa Safe Spaces Act at statutory rape ang naaresto sa siyudad na ito, ayon sa Police Regional Office 3 (PRO 3).

Ang unang suspek, si alyas “Jerry,” 39-anyos, ay pinagsilbihan ng warrant of arrest habang nakakulong sa custodial facility ng Police Station 5 para sa kasong qualified gender-based sexual harassment in streets and public places sa ilalim ng Republic Act (RA) 11313 o Safe Spaces Act.

Isa pang Amerikanong si alyas “Shiloo Zore,” 62-anyos, ay inaresto dahil sa paglabag sa RA 8353 o Anti-Rape Law of 1997.

Matapos ang pag-aresto, inilagay ang dalawang akusado sa kustodiya ng pulisya habang hinihintay ang pag-turn over sa kaukulang hukuman.