ISANG tindero ng isda ang nanalo ng P24.68 milyong jackpot prize ng Lotto 6/42.

Pumunta ang 35-anyos na lalaki sa tanggapan ng Philippine Charity Sweepstake Office (PCSO) sa Mandaluyong City upang kubrahin ang kanyang premyo.

Ang winning number combination na 28-10-30-08-01-16 ay lumabas umano sa bola noong Oktobre 25, 2022.

May walong taon na umano nitong tinatayaan ang naturang kombinasyon na mula umano sa kaarawan nito at ng kanyang mahal sa buhay.

“Ang premyo pong nakuha ko ngayon ay mapupunta at ibabahagi ko sa aking pamilya lalo na sa mga kapatid ko. Sana marami pa kayong matulungan at sana marami ding makakuha ng swerte tulad ng nakamit ko po. Salamat PCSO,” sabi ng nanalo.