NAGLAAN ang Kamara de Representantes ng karagdagang ₱10.06 bilyon para sa mga programa sa edukasyon sa panukalang pambansang badyet para sa 2027 upang matulungan ang mas maraming kabataang Pilipino na makapag-aral, makapagtapos at magkaroon ng magandang kinabukasan.

Ayon kay House Speaker Faustino “Bojie” G. Dy III, inaprubahan din ng Kamara ang ilang panukalang batas na naglalayong palawakin ang access sa edukasyon at matiyak na hindi magiging hadlang ang kahirapan sa pagkamit ng mga pangarap ng kabataang Pilipino.

“Sa bawat kabataang Pilipino na nagsisikap para maabot ang kanilang mga pangarap, katuwang ninyo ang Kongreso. Hindi dapat maging hadlang ang kahirapan para hindi makapagtapos ng pag-aaral ang kabataang Pilipino,” pahayag ni Dy nitong Lunes ng gabi.

Ayon sa Speaker, nakatuon ang karagdagang pondo sa pagpapalakas ng kaligtasan sa mga paaralan, pagsusulong ng inklusibong edukasyon, pagtulong sa mga mag-aaral na makabawi sa kanilang pag-aaral, at pagpapalawak ng access sa de-kalidad na edukasyong pangkolehiyo.

Kabilang sa mga programang makatatanggap ng karagdagang pondo ang mga sumusunod:

– ₱2.1 bilyon para sa Tertiary Education Subsidy na naglalayong tulungan ang mga estudyante sa kolehiyo.
– ₱1.93 bilyon para sa Basic Education Voucher Program na magbibigay ng tulong sa mga mag-aaral mula kindergarten hanggang Grade 6.
– ₱1.77 bilyon para sa Tulong Dunong Program.
– ₱500 milyon para sa School Safety and Security Program upang mapalakas ang seguridad sa mga paaralan at matugunan ang mga pangamba ng mga magulang tungkol sa kaligtasan ng kanilang mga anak.

Binigyang-diin ni Speaker Dy na bukod sa pagprotekta sa mga mag-aaral, mahalaga ring matiyak na mayroon silang sapat na pagkakataong makapagpatuloy sa pag-aaral at makapagtapos.

“Bukod sa proteksyon ng ating mga anak, kailangan din nating tiyakin na mayroon silang pagkakataong makapag-aral, makapagtapos, at magkaroon ng magandang kinabukasan,” ang pahayag ni Speaker Dy.

Bukod sa karagdagang pondo, binanggit din ni Dy ang pag-apruba ng Kamara sa ikatlo at huling pagbasa sa Basic Education Voucher Assistance Act na naglalayong palawakin ang voucher assistance para sa mga mag-aaral mula kindergarten hanggang elementarya.

Layunin ng panukala na mabigyan ng mas maraming pagkakataon ang mga mag-aaral na makapasok sa paaralan at magkaroon ng access sa de-kalidad na edukasyon.

Iniulat din ng Speaker ang pagsasabatas ng mga susog sa Universal Access to Quality Tertiary Education Act na nagbibigay-priyoridad sa mga mag-aaral mula sa mga pamilyang benepisyaryo ng Pantawid Pamilyang Pilipino Program (4Ps) at nagpapalawak ng tulong para sa mga estudyanteng higit na nangangailangan.

Ayon kay Dy, bahagi ang mga hakbang na ito ng pagsisikap ng Kongreso na mabawasan ang pinansiyal na pasanin ng mga pamilyang Pilipino at mabigyan ng patas na pagkakataon ang mga kabataan na makapagtapos ng pag-aaral.

Iniulat din ni Dy ang pagpapatibay ng Kamara sa Presidential Merit Scholarship Program, na kabilang sa mga prayoridad na panukala ng Legislative-Executive Development Advisory Council (LEDAC).

Layunin ng programa na higit pang mapalawak ang mga oportunidad sa edukasyon para sa mga kabataang Pilipino.

Sa pamamagitan ng karagdagang pondo at mga panukalang batas na nakatuon sa edukasyon, umaasa ang Kamara na mas maraming mag-aaral ang makapagpapatuloy sa kanilang pag-aaral, makapagtatapos, at magkakaroon ng mas magandang oportunidad sa hinaharap.

Binigyang-diin ni Dy na patuloy na susuportahan ng Kongreso ang mga programang magbibigay ng mas malawak na access sa edukasyon at tutugon sa pangangailangan ng mga estudyante at kanilang mga pamilya.

To God be the Glory