TALAVERA, Nueva Ecija – Rumesponde ang mga alertong operatiba ng kapulisan dito sa isang disturbance call at inaresto ang umano’y lasing na 57-anyos na magsasaka na nag-a-amok at nagbabantang saktan ang mga taong dumadaan sa kalsada habang hawak ang isang bote ng gin sa kanyang kamay noong Biyernes ng gabi dito.

Ayon kay police head Lt. Col. Marlon M. Cudal, ang naarestong suspek, na isang residente ng Bgy. Bacal II, ay nakuhanan din ng dalawang plastic sachet na naglalaman ng shabu na nagkakahalaga ng P680.

Nang rumesponde sa lugar, sinabi ni Cudal na natagpuan ng kanyang tauhan na nanggugulo ang suspek sa lugar at sinisigawan ng maanghang na salita ang mga taong dumadaan habang tangan ang isang bote ng gin dakong alas-9 ng gabi dito.

Nagawang patahimikin ng otoridad ang suspek, at nakuhanan ito ng shabu sa isang routine body search.

Agad dinala sa himpilan ng pulisya ang suspek para sa kaukulang disposisyon dito.

Inihahanda na ang kasong alarm and scandal at paglabag sa Republic Act 9165 para sa inquest-filing laban sa suspek sa provincial prosecutor’s office sa Cabanatuan City.