CAMP GENERAL MARIANO LLANERA, Cabanatuan City–Nakapagtala ng 102,014 na paglabag sa Department of the Interior and Local Government (DILG) Safer Cities program sa Gitnang Luzon mula Abril 6 hanggang Mayo 7.

Ayon sa record, ang Nueva Ecija police ang nanguna sa rehiyon sa bilang ng mga lumabag na may 24,963; kasunod ang Bulacan, 20,227; at Pampanga, 17,081.

Ayon kay Brig. Gen. Jess B. Mendez, hepe ng Police Regional Office 3, nakamit ang mga resulta ng paglabag sa pagpapatupad ng “90% deployed at 10% stay-behind” deployment scheme.

Layon ng programa na matiyak ang mas malakas na presensya ng mga pulis sa lugar sa pamamagitan ng checkpoints, pagpapatrolya at pagpapatupad ng ordinansa sa buong rehiyon.

Sinabi ni Mendez na ito ay naaayon sa Philippine National Police (PNP) Focused Agenda ni Chief PNP Gen. Jose Melencio Nartatez Jr.

Ipinakita rin sa mga rekord na ang inisyatibo ng Safer Cities ng DILG ay nakalikom ng kabuuang P11,935,789 na multa.

May 31,705 na lumabag ang pinagmulta, habang 70,309 ang binalaan matapos ang dokumentasyon at oryentasyon sa mga ordinansa.

Pinakakaraniwang paglabag na naitala ang mga paglabag sa batas trapiko, 29,767; pag-inom at paninigarilyo sa mga pampublikong lugar, 28,937; mga menor de-edad na lumalabag sa curfew; 21,092; at paggala sa kalye, 16,024.

“Tinitiyak ng aming estratehiya sa pag-deploy na mas maraming tauhan ng pulisya ang makikita at mapupuntahan ng publiko,” sabi ni Mendez.