MAGPAPAKALAT ang Metropolitan Manila Development Authority (MMDA) ng mahigit 2,000 tauhan sa Holy Week sa iba’t ibang lansangan at transportation hub.

Ayon kay MMDA spokesperson Mel Carunungan tutukan ng ahensya ang mga kalsada malapit sa mga paliparan, pantalan, at terminal ng bus para sa inaasahang pagdagsa ng mga pasaherong magbabakasyon.

Sinabi ni Carunungan na pinagbawalan umano ng ahensya ang mga tauhan nito na mag-day off o mag-leave mula Abril 5 hanggang 7 at 10.

Wala namang number coding mula Abril 6 hanggang 10.

Nagsama-sama ang MMDA, Land Transportation Office, Land Transportation Franchising and Regulatory Board, at Philippine National Police para tiyakin ang kaligtasan ng mga motorista at biyahero.