NASABAT ng mga tauhan ng Office for Transportation Security (OTS) ang dalawang magazine ng baril mula sa isang pasaherong patungong Hanoi, Vietnam sa Ninoy Aquino International Airport Terminal 1 noong Enero 20.

Napansin ng X-ray operator na si Roberto Martos ang isang kahina-hinalang item sa bagahe ng pasahero kaya ipinaalam sa baggage inspector na si Jennifer Garcia.

Nagsagawa ng manual inspection sa bagahe at natuklasan ang dalawang loaded magazines na may 24 live ammunition.

Ipinasa sa Philippine National Police-AVSEGROUP ang naharang na magazine para sa nararapat na aksyon at pinayagang makasakay sa eroplano ang pasahero matapos magpakita ng kaukulang dokumento.