CAMP GEN. MARIANO N. LLANERA, Cabanatuan City–Nasakote ang 17 hinihinalang tulak sa lalawigang ito at nakumpiska ang P267,820 na halaga ng shabu at marijuana.

Ikinasa ang buy-bust sa Gapan City, Science City of Muñoz, General Tinio, Carranglan, Llanera at Guimba.

Nagresulta ang operasyon sa pagsamsam ng 43.83 gramo ng pinagsamang shabu at marijuana na may katumbas na halagang P267,820.

Inihahanda na ang mga kasong paglabag sa RA 9165 (Comprehensive Dangerous Drugs Act of 2002) laban sa mga naarestong suspek.

“Ang laban kontra ilegal na droga ay hindi lamang operasyon ng pulisya—ito ay laban para sa kinabukasan ng ating mga pamilya at komunidad,” sabi ni Nueva Ecija police chief P/Col. Ritchie Claravall.