HAWAK na ng mga pulis ang lalaking barista na sinasabing huling taong nakasama ng lalaking natagpuang patay sa hotel sa Quezon City noong Miyerkules.

Inilarawan ang biktima na nasa pagitan ng edad 30-35, may taas na 5’4, medium built, may mga tattoo sa tiyan at naka-itim na sando.

Sa report ng Criminal Investigation and Detection Unit ng Quezon City Police District (CIDU-QCPD), bandang alas-3:35 ng madaling araw noong Miyerkules natagpuan ang bangkay ng biktima sa Paradise hotel sa Tomas Morato Ave., Brgy. South Triangle, Quezon City.

Batay sa imbestigasyon ni P/MSg George Caculba, bago ang insidente, nagkita ang suspek at biktima sa restaurant sa Cubao at nagkasundo na magkita sa Paradise Hotel.

Nag-check-in ang biktima bandang alas-10:27 ng gabi noong Marso 31 habang nag-check-in ang suspek sa kalapit na kuwarto bandang alas-10:52 ng gabi.

Bandang alas-10:00 ng gabi ng April 1 nag-check-out ang suspek sa kanyang kuwarto pero kinabukasan bandang alas-3:00 ng madaling araw bumalik ito sa hotel.

Inutusan ng cashier ng hotel ang ang room boy na tulungan ang suspek na magtungo sa inokupa ng kuwarto ng biktima para tingnan ang kalagayan ng biktima.

Magkasama umanong pinuntahan ng suspek at roomboy ang biktima sa nasabing kuwarto at binuksan nila ang kuwarto gamit ang duplicate key ng hotel.

Pagpasok sa loob, nadiskubre nila ang wala ng buhay na biktima na nakahiga sa sa ibabaw ng kama.

Dumating ang SOCO team mula sa QCPD sa pangunguna ni P/Maj. Eric Angay Angay at nasamsam sa silid ng biktima ang bote ng mineral water na may mga mantsa ng dugo.

Nadiskubre din na na-dislocate ang dalawang kamay ng biktima at may sugat sa labi.