ARESTADO ang lalaki na nakasuot ng uniporme ng Manila Traffic and Parking Bureau (MTPB) habang nagmamanado ng parking area sa Mel Lopez Boulevard, Brgy. 101, Tondo, Manila noong Biyernes.

Nakilala ang suspek na si alyas Marc, 39, ayon kay Police Major Edward Samonte.

Bandang alas-10:25 ng umaga ng damputin nina Ma. Monalita Silvano at Jan Rodel Poe, mga tunay na miyembro ng MTPB, ang suspek sa naturang lugar.

Inaresto ang suspek dahil sa paglabag sa Art. 177 (Usurpation of Authority and Official Functions).

Nilapitan ng mga arresting officer ang suspek at nagpakilalang mga MTPB traffic enforcers na nakatalaga sa lugar. Nang hilingin na magpakita ng pagkakakilanlan, walang maibigay ang suspek kaya tinuluyan siyang arestuhin.