ISINULONG ni Leyte 1st District Representative at dating House Speaker Ferdinand Martin G. Romualdez ang pagreporma sa Bank Secrecy Law upang mas epektibong malabanan ang korapsyon, money laundering at iba pang financial crime na sumisira sa tiwala ng publiko sa pamahalaan.

Sa ilalim ng House Bill No. 7, na inihain ni Romualdez sa pagbubukas ng 20th Congress, aamyendahan ang Republic Act No. 1405 upang payagan ang Bangko Sentral ng Pilipinas (BSP) na siyasatin ang mga deposito sa bangko—kabilang ang foreign currency accounts na iniuugnay sa ilegal na aktibidad.

“We want to send a clear message: the Philippines should no longer be a safe haven for dirty money,” pahayag ni Romualdez. “If we want honest governance and a stronger financial system, we must update our laws and give our regulators the tools they need to protect the people’s money.”

Kasama sa umakda ng panukala sina Tingog Party-list Reps. Jude Acidre at Andrew Julian Romualdez bilang mga co-authors.

Ayon sa kanila, bagama’t orihinal na layunin ng batas na palakasin ang tiwala ng publiko sa sistemang pagbabangko, ginagamit na ito ngayon bilang taguan at panangga ng mga ilegal na aktibidad gaya ng money laundering at katiwalian.

“In its current form, the law is being used to shield illegal acts such as money laundering, tax evasion, and corruption. That needs to change,” giit ni Romualdez.

Ayon sa panukala, puwedeng magsagawa ng imbestigasyon ang BSP kung may sapat na dahilan ang Monetary Board na maghinala ng pandaraya o iregularidad na kinasasangkutan ng mga opisyal, stockholders, empleyado o sinumang konektado sa mga institusyong sakop nila.

Kasama rin sa maaaring imbestigahan ang mga ipinasarang bangko at mga foreign currency deposit, maliban sa mga nasa thrift associations na para lang sa mga miyembro nito.

Upang maiwasan ang pang-aabuso at mapanatili ang karapatan sa privacy ng mga lehitimong depositors, lilimitahan ang paggamit ng BSP sa anumang impormasyon.

Ang mga natuklasan ay gagamitin lamang sa loob ng ahensya o maibabahagi lamang sa mga institusyong gaya ng Securities and Exchange Commission (SEC), Philippine Deposit Insurance Corporation (PDIC), Anti-Money Laundering Council (AMLC), Department of Justice (DOJ) o korte—at tanging kung kinakailangan ng batas.

Nilinaw rin ng panukala ang kahulugan ng “deposito” at tiniyak ang proteksyon sa mga bangko at empleyadong kumikilos ayon sa utos ng BSP at sa batas. Walang pananagutang kriminal o sibil ang sinumang sumunod nang may kabutihang loob.

Samantala, ang sinumang mapatunayang naglabas ng impormasyon nang walang pahintulot ay papatawan ng parusang pagkakakulong mula dalawa hanggang 10 taon, at multang mula ₱50,000 hanggang ₱2 milyon.

“This is about accountability, not overreach,” ayon kay Romualdez. “We are making sure that while we strengthen transparency, we also protect the privacy of ordinary citizens.”

Nilalayon ng panukala na iayon ang Pilipinas sa mga international standard at alisin ang mga balakid sa pagsugpo sa ilegal na pananalapi.

“In a time when Filipinos are demanding more honest leadership and cleaner governance, this bill is a concrete step forward,” dagdag ni Romualdez. “We cannot fight corruption with blindfolds on.”

Giit ni Romualdez, ang pagbibigay ng malinaw na kapangyarihan ng BSP ay magpapatibay sa oversight power ng mga institusyon, magpapalakas sa tiwala ng mga mamumuhunan, at magbibigay proteksyon sa sistemang pampinansyal ng bansa laban sa pang-aabuso.