ISANG selfie at ang CCTV camera ang nagsilbing “ultimate witnesses/evidence” upang maresolba ng Nueva Ecija Provincial Police Office ang kaso ng isang negosyanteng babae at ng kanyang driver na pinaslang at sinunog sa loob ng sasakyan sa Peñaranda noong Marso 9, ayon sa local police director nitong Lunes.

Sinabi ni Nueva Ecija Police Director Col. Ritchie R. Claravall sa Journal Group na bago mapatay ang mga biktima, nakuhanan ng negosyante ang isang selfie kasama ang hinihinalang utak ng krimen at ang gun-for-hire sa loob ng kanyang pulang Toyota Wigo.

Ipinadala ng biktima ang litrato sa kanyang live‑in partner na nasa abroad at sa ilang kaibigan.

Ang nasabing larawan, kasama ng CCTV footage na nagpapakita sa dalawang suspek na nagtutulungan sa pagsunog ng sasakyan sa Barangay Sinasajan, ang naging matibay na ebidensiya sa imbestigasyon.

Ani Claravall, ang selfie ang pinakamalakas na uri ng ebidensiyang nagpapakita na kasama ng mga biktima ang dalawang suspek bago sila pinatay.

Dagdag pa rito ang CCTV footage na makikita ang pagdating ng dalawang suspek na sakay ng tricycle at kung paano kinuha ng isa ang container ng gasolina at ibinuhos ito sa sasakyan bago ito silaban.

“We have solid pieces of evidence against the suspects. Akala nila walang CCTV sa lugar na ’yun. Isa pa, mas matibay ’yung selfie ng victim kung saan makikita ang dalawang suspects sa likod,” ani Claravall sa interview sa Camp Crame.

Sinabi ni Police Regional Office 3 (PRO‑3) Director Brig. Gen. Jess B. Mendez na naresolba ng Nueva Ecija police ang kaso matapos maaresto ang limang suspek wala pang 48 oras mula nang matuklasan ang krimen.

Natagpuan ang sunog na sasakyan na may lamang sunog na labi ng dalawang biktima malapit sa isang poultry farm sa Brgy. Sinasajan ng alas-10:40 ng umaga noong Marso 9.

Sa tulong ng mga saksi at ng mga kaibigan ng biktima na nagbigay ng selfie, mabilis na natukoy ang mga suspek.

Ang footages mula sa CCTV na nakita ang pagsunog sa kotse ay nakatulong din sa pulisya para matukoy ang mga suspek. Apat sa kanila ang naaresto noong Marso 11 sa Brgy. Siempre Viva Sur, Mallig, Isabela.

Ani Claravall, lumabas sa imbestigasyon na ang babaeng hinihinalang utak ng krimen ay may pagkakautang umano na humigit-kumulang P2.5 milyon sa biktimang negosyante.

Pinaniniwalaang inilatag niya ang plano sa pamamagitan ng pag-akit sa mga biktima na sumama sa kanya at sa isang lalaki na kalaunan ay napag-alamang inupahan upang pumatay.

Pinaniniwalaang patay na ang mga biktima bago pa man sinunog ang sasakyan.

Ang hinihinalang utak ng krimen at asawa nito, driver at security personnel ay naaresto na at nahaharap sa mga kasong kriminal. Ilan sa kanila ay kinasuhan din ng harboring. Lahat sila ay nasa kustodiya ng Peñaranda Municipal Police Station.

Isang suspek — ang mismong gunman na nakita sa selfie — ay patuloy pang tinutugis ng pulisya, sinabi ni Claravall. Aniya, ang kapatid ng negosyante ang nagpadala sa kanila ng selfie.

Nakilala ng mga kaibigan ng biktima ang hinihinalang utak bilang isa sa mga taong nasa larawan.

Napag-alaman din na nagtungo ang mga suspek sa Laoag City matapos ang krimen, bago tumuloy sa Mallig kung saan sila nahuli. Isa pang suspek na nagmaneho ng tricycle ay naaresto kinabukasan, habang ang gunman ay nananatiling at-large.

Dagdag pa ni Claravall, may mga naunang paratang din laban sa hinihinalang utak kaugnay ng ilegal na bentahan ng lupa at sasakyan gamit ang pekeng dokumento.

Isang baril na may 14 na bala ang narekober mula sa isa sa mga suspek sa Mallig at isinasailalim sa forensic examination upang matukoy kung ito ang ginamit sa pagpatay.