Isang bagong survey ng Philippine National Police (PNP) ang nagpapakita na sa pamumuno ni General Nicolas D. Torre, mataas na ang antas ng paggamit ng police hotlines ng mga Pilipino simula nang ipatupad ang 3-Minute Response Time o 3MRT program sa Metro Manila, Gitnang Luzon, at Calabarzon noong Hunyo.

Ayon sa pag-aaral na isinagawa ng PNP Directorate for Police-Community Relations (DPCR), 53.13 porsyento ng mga nakapanayam ang nagsabing sila mismo o kilala nila ang tumawag sa numerong pang-emerhensiya ng pulisya mula nang ipatupad ang 3MRT program.

Ipinapakita nito na mahigit kalahati ng mga sumagot ay may direktang karanasan o personal na pagkakakilala sa isang taong tumawag sa hotline—na nagpapahiwatig ng malawakang paggamit at pagtangkilik ng publiko sa bagong sistema ng pagtugon sa emerhensiya.

Sa kabilang banda, ang 46.87 porsyento na hindi pa nakakatawag ay maaaring nangangahulugang hindi nila ito kinailangan, kulang sa kaalaman, o may pag-aalinlangan pa sa paggamit ng serbisyo.

Ayon sa PNP, mahalagang gamitin ang ganitong mga impormasyon upang masukat ang lawak ng kampanya para sa kaalaman ng publiko at aktuwal na paggamit ng 3MRT sa mga komunidad.

Nang tanungin kung gaano katagal bago dumating ang mga pulis sa lugar ng insidente, 37.38 porsyento ang nagsabing hindi sila sigurado o hindi naaangkop sa kanila ang tanong—marahil dahil hindi sila saksi sa pangyayari o hindi direktang kasangkot.

Gayunpaman, 26.89 porsyento ng mga sumagot ang nagsabing dumating ang mga pulis sa loob ng tatlong minuto, alinsunod sa layunin ng programa.

Ipinapahiwatig ng datos na bagama’t marami ang nakaranas ng mabilis na tugon, marami rin ang hindi nakapagpatunay ng eksaktong oras ng pagdating ng pulis.

Ayon sa PNP, “Ipinapakita nito na kailangan pang paigtingin ang pagpapabatid sa publiko kung ano ang dapat asahan sa 3MRT, gayundin ang pagpapahusay sa komunikasyon at feedback mechanism pagkatapos ng bawat tawag sa emerhensiya.”

Mula sa kabuuang 27,320 kalahok, 83.9 porsyento ang nagsabing may malinaw na pagbuti sa pagtugon ng pulisya mula nang maipatupad ang 3MRT. Sa bilang na ito, 18,467 katao (56.71%) ang nagsabing “Malaki ang Pagbuti” at 8,853 katao (27.19%) naman ang nagsabing “Bahagyang Pagbuti” ang kanilang napansin.

Ayon sa pagsusuri ng PNP, “Ipinapakita ng datos na positibo ang pananaw ng publiko sa epekto ng programa sa bilis ng pagtugon ng kapulisan. Ang mahigit kalahati na nagsabing malaki ang pagbabago ay patunay na natutugunan na ang dating reklamo sa mabagal na pagresponde ng pulisya.”

Dagdag pa rito, ikinagulat ng PNP na sa mga sumagot, 13,165 (40.43%) ang nagsabing sila ay “Nasiyahan” habang 13,026 (40.00%) ang “Lubos na Nasiyahan” sa pagtugon ng pulisya mula nang magsimula ang programa noong Hunyo 3.

“Ipinapakita ng halos pantay na dami ng nasiyahan at lubos na nasiyahan na epektibo ang programa sa mata ng publiko. Ipinapahiwatig nito na natutugunan ng 3MRT ang inaasahan ng komunidad,” ayon pa sa pagsusuri.

Isiniwalat din ng PNP-DPCR sa Journal Group na batid ng mga Pilipino ang tungkol sa 3MRT program at mataas ang kumpiyansa ng publiko na ito ay magiging isang institusyonalisadong polisiya ng PNP para sa 24/7 proteksyon ng mamamayan.

Ayon sa ika-31 hepe ng PNP at unang hepe na galing sa PNP Academy, layunin niyang ipatupad ang 3MRT sa buong Metro Manila, Central Luzon, at Calabarzon. Sa kasalukuyang yugto, iniutos niyang 5-Minute Response Time muna ang target ng kanyang mga tauhan.

“Mahal naming mga kababayan, huwag niyo na kaming hanapin sa mga presinto sapagkat kami ay nasa inyong mga telepono na. Tumawag lamang sa 911 at darating kami sa loob ng limang minuto,” ayon sa miyembro ng PNPA ‘Tagapaglunsad’ Class of 1993, habang inatasan niya ang lahat ng field commanders na tiyaking sanay silang gumamit ng police radios upang agad na makapag-utos mula sa command centers anumang oras.

Ang survey ay isinagawa sa halos 33,000 katao mula Hunyo 10–15, 2025, sa mga urbanisadong lugar, gamit ang Google Forms, at ipinamudmod sa lahat ng Police Regional Offices (PROs) upang masukat ang bisa at pangmatagalang epekto ng 3MRT program.

Ang 3MRT program ay unang inilunsad ni Gen. Torre habang siya ay hepe ng Quezon City Police District, na may layuning makaresponde ang pulis sa loob ng tatlong minuto mula sa tawag.

Inangkat din ito sa Davao City noong siya ay naging direktor ng Police Regional Office 11.

Bagama’t malaki ang suporta sa programa para sa pampublikong kaligtasan, may ilang lokal na opisyal na nagpahayag ng pangamba sa pagiging epektibo at kakayahang panatilihin ito sa pangmatagalang panahon.

Ang 3MRT ay isang proaktibong hakbang sa pagpapatupad ng batas, na binibigyang-diin ang agarang pagtugon sa mga emerhensiya. Nakasalalay ang tagumpay nito sa patuloy na pagsusuri, sapat na pondo, at pakikiisa ng komunidad.