SA pangunguna ni Alyssa Villamor, pinadapa ng Uratex Dream ang Angelis Resort, 20-16, upang makumpleto ang Leg 2 sweep ng FSD Auto Insurance-WNBL 3×3 nitong weekend sa Hoopla Gym in Muntinlupa City.

Walang talo ang Dream sa torneo, kung saan nanalo sila sa Pool A tampok ang 20-19 pagungos sa Angelis Resort sa kanilang huling group game.

Nanalo rin ang Uratex Dream sa We Got Next, 21-9, Sureviewd, 21-8, at Boost Bball Science, 21-7, bago maitarak ang 22-11 tagumpay kontra sa JJD sa semifinals.

“I’m so grateful and blessed to be part of this league. I thank God and sa family ko for this,” sabi ni Villamor. “There is always room for improvement. We will keep on doing our best for Leg 3.”

Ang Dream ay binubuo rin nina Tina Deacon, Angel Anies at Kaye Pingol.

Noong December, nakuha rin Uratex Dream ang Leg 1 crown matapos talunin ang JiaGuel sa championship game na idinaos sa Bren Z. Guiao Convention Center.

Pinagbibidahan nina Shyvell Love Sigua, Blanche Bahuyan, Jenina Solis and Bea Pesito, pumasok ang Angelis Resort sa championship game matapos magtala ng 3-1 win-loss record sa Pool A at sa 21-18 panalo laban sa Uratex Tibay sa semifinals.

Pumangatlo naman ang Uratex Tibay, na kasama sina Kat Quimpo, Sam Harada, Ford Grajales at Eunique Chan sa roster. Winalis ng Tibay ang Pool B bago yumuko sa Angelis Resort.

Kasali rin sa Leg 2 ang Alona QWBT, Dreamers at Rizal Huskies.