𝗡𝗜𝗟𝗜𝗡𝗔𝗪 𝗻𝗶 𝗧𝘂𝘁𝗼𝗸-𝗧𝗼-𝗪𝗶𝗻 𝗣𝗮𝗿𝘁𝘆 𝗟𝗶𝘀𝘁 𝗖𝗼𝗻𝗴. 𝗦𝗮𝗺𝘂𝗲𝗹 “𝗦𝗮𝗺” 𝗦. 𝗩𝗲𝗿𝘇𝗼𝘀𝗮,𝗝𝗿. 𝗻𝗮 𝘄𝗮𝗹𝗮𝗻𝗴 𝗯𝗮𝗹𝗮𝗸 𝗹𝘂𝗺𝗮𝗵𝗼𝗸 𝘀𝗮 𝗽𝗼𝗹𝗶𝘁𝗶𝗸𝗮 𝗼 𝗸𝗮𝘆𝗮’𝘆 𝘁𝘂𝗺𝗮𝗸𝗯𝗼𝗻𝗴 s𝗲𝗻𝗮𝗱𝗼𝗿 𝘀𝗮 𝗱𝗮𝗿𝗮𝘁𝗶𝗻𝗴 𝗻𝗮 𝟮𝟬𝟮𝟱 𝗺𝗶𝗱-𝘁𝗲𝗿𝗺 𝗲𝗹𝗲𝗰𝘁𝗶𝗼𝗻𝘀 𝗮𝗻𝗴 𝗧𝗩 h𝗼𝘀𝘁 𝗻𝗮 𝘀𝗶 𝗪𝗶𝗹𝗹𝗶𝗲 “𝗞𝘂𝘆𝗮 𝗪𝗶𝗹𝗹” 𝗥𝗲𝘃𝗶𝗹𝗹𝗮𝗺𝗲 𝗺𝗮𝘁𝗮𝗽𝗼𝘀 𝗺𝘂𝗹𝗶𝗻𝗴 𝗹𝘂𝗺𝘂𝘁𝗮𝗻𝗴 𝗮𝗻𝗴 𝗽𝗮𝗻𝗴𝗮𝗹𝗮𝗻 𝗻𝗶𝘁𝗼 𝗯𝗶𝗹𝗮𝗻𝗴 𝗽𝗼𝘁𝗲𝗻𝘀𝗶𝘆𝗮𝗹 𝗻𝗮 𝗸𝗮𝗻𝗱𝗶𝗱𝗮𝘁𝗼.

Ginawa ni Verzosa ang paglilinaw matapos ilunsad sa Sampaloc, Manila ang KaSAMa Movement na binubuo ng iba’t-ibang sektor at barangay leaders para maghatid ng serbisyo sa iba’t-ibang bahagi ng bansa sa pamamagitan ng pamamagi ng libreng gamot, dental sevices, pamimigay ng mga wheelchair at iba pang mga pangangailangan.

Sinabi ni Verzosa na ang inilunsad nitong programa ay naglalayong maibigay ang nararapat na social services hindi lamang sa libo-libong residente ng Sampaloc, Manila bagkos para sa lahat ng mamamayang Pilipino sa iba’t-ibang dako ng bansa na nangangailangan ng de-kalidad na paglilingkod partikular na sa usaping medikal o pang-kalusugan.

Nang maitanong kay Verzosa ang issue patungkol kay Revillame kung saan muli na naman nangunguna ang pangalan nito bilang potensiyal na kandidato o senatoriable para sa 2025 mid-term elections, sinabi ng kongresista na lagi naman namamayagpag ang pangalan ng TV host sa survey subalit hindi naman talaga nito sineseryoso ang pakikilahok sa politika.

“Si Kuya Will ay lagi naman nasa top o nangunguna sa mga survey bilang Senatoriable. Ever since hindi ko pa siya kilala tuwing may election may pumipilit sa kaniyang tumakbo alam naman natin na napaka-lakas niya sa Masa ang dami niyang natutulungan. Pero until now hindi pa naman siya tumatakbo,” sabi ni Verzosa.

Binigyang diin pa ng kongresista, matalik na kaibigan ni Revillame, na ang puso talaga ng nasabing TV Host ay nasa paglilingkod sa pamamagitan ng kaniyang programa sa telebisyon.

“Ang puso talaga ni Kuya Will ay ang pagbibigay ng serbisyo sa Masa sa pamamagitan ng kaniyang programa sa telebisyon. Yun lang eh’ kuntento na siya. Hindi na niya kailangang kumandidato o tumakbong senador,” dagdag pa ni Verzosa.